Ua lesitala nei i le tusi o matai lesitala o le atunuu le Suafa Tupu o le Gato‘aitele o se tasi o suafa maualuga i suafa matai tetele o le Tafa‘ifa o Samoa na faaee atu i le afioga Savea Sano Malifa i le aso 21 o Iuni 2014.
O se faanofo Tupu na faatumulia ai Samoa aemaise o le afioaga o Afega e ui sa solitu se isi vaega o le nuu. Talu mai lena tausaga na faatino ai le faaeeina o le suafa maualuga ma mamalu o Samoa sa iai ni vala sa tulai mai sa mafua ai ona tuai lesitala le suafa i le ofisa o faamasinoga o Fanua ma Suafa i Mulinuu.
Na taunuu lava i le tuuina atu o se talosaga a le afioga Savea Sano ma lona aiga i le Faamasinoga Maualuga (Supreme Court) na fesiligia ai le faaiuga a le Lesitala sa avea ma Ofisa Sili o le Matagaluega o Faamasinoga le tofa Masinalupe Tusipa Masinalupe na ia taofia ai le lesitalaina o le suafa ona o lana mau e lei usu le isi vaega o le nuu o Afega.
Na tuuina atu se talosaga a le Loia Sili a le Malo sa tulai mo le ofisa o faamasinoga ina ia soloia ma taofia le suesueina o le talosaga, peitai na aumai le faaiuga ma teena le mau a le Loia Sili ma faatulaga ai loa le aso e fofogaina ai le talosaga mo se faaiuga e faasino i le faaiuga a le lesitala sinia o faamasinoga le ofisa sili sa iai ua lē toe filifilia.
O le vaiaso ua mavae na maua ai i sailiiliga i le ofisa o faamasinoga ma ni mau faatuatuaina ua taoto nei i lagotonu le mataupu ma ua lesitala aloaia nei le suafa Gato‘aitele o le afioga Savea Sano Malifa. Ua faaalia e se molimau o le taotoga ua iai nei le mataupu ua agai ai le ofisa o faamasinoga i nisi sailiiliga auiliili i le mafuaaga na tuai ai ona lesitala le suafa matai.
O le umia o le suafa Gato‘aitele e Sano Malifa na afua mai i se finagalo o lona aiga potopoto o suli ma feoi o le suafa Gato‘aitele ina ua mae‘a ni faamasinoga i le faamasinoga o Fanua ma Suafa, lea na faamautu ai ua na o le aiga lava e aiā i le suafa ma o latou foi e faia le filifiliga. O se faaiuga e iai le talitonuga na mafua ai ona teena se talosaga na faaulu na faalavelave ai i le faaeeina o le suafa Gato‘aitele.
O lenei suafa e tusa o tala tuu fofoga a Samoa mai le taimi o le uluai Tafa‘ifa o se suafa tau Tupu e ave i ai faalagiga maualuluga e na o Tupu o Samoa e agavaa i ai.
O loo iai foi le talitonuga o nisi sa fesilisili i ai i so latou silafia, e tatau ona aloaia ma amanaia e le Malo le suafa Gato‘aitele ua nofoia nei i tofiga maualuluga o le Malo e pei o le Ao o le Malo ma le tofi Sui o le Fono a Sui Tofia poo le Sui Ao. O le afioga Gato‘aitele Sano Malifa o se tamalii e lauiloa e le atunuu i lana tautua o se tusitala e lē gata i lana nusipepa ae faapea foi i ni tusi ua mae‘a ona ia tusia.
O lana Masiofo o le afioga Muliagatele Jean Ash Malifa o le Pule o le la pisinisi faasalalau le nusipepa o le Samoa Observer.
