Toeitiiti leai se avanoa i le maota o le EFKS i Porirua i le toatele o i latou na mafai ona auai atu e talia le valaaulia mai Le Mau (Not Stuck) o se vaega faafiafia na faatonutonuina e le tamaitai o Jasmine Leota, i le po o le Aso Faraile na tea nei.
O lenei faaaliga o se sailiga tupe lea mo le malaga atu a lenei vaega i Aukilani ma na amataina i le tatalo na saunia e le susuga i le Faafeagaiga ia Nove Vailaau, ma sosoo ai ma lana sausaunoaga faa-Samoa na sausaunoa ai ma lona faletua ia Penina Vailaau e tatala ai le po fiafia.
O le fofoga o le po na feagai lea ma le susuga ia Elia Koloi, ma o se alii foi e agamalie ma faa‘ata maimoaga ona e matuā saunia lelei ana tala i isi taimi ae faalē mālie foi i isi taimi, ae o le mea sili lava o le maua ai o le ‘ata.
E tele ni aufaafiafia na auai i lea po e pei o le alii o Fala Tavita, le tamaitai onomea i lana hula faa-Atukuki o Karen, le fa‘ili a le Youth mai le EFKS Porirua, o tamaiti onomea mai le kolisi a Aotea, le aufaafiafia Tokelau mai le Hutt Valley, le quartet a alo o Esera mai le EFKS Cannons Creek, o le Oku Roots aemaise lava le faamalosi tino (Zumba) lea na faamalosi ai tino o le aumaimoa i lea po.
Na faasolo loa le faatinoga o Le Mau (Not stuck), ma o se vaaiga matagofie ma le faamomoiloto foi ina ua tomanatu i le talafaasolopito o Samoa ma foliga o le taimi na tagatavale ai Tupua Tamasese i le pāpā mai o fana a o faatino lelei e tama ma teine na lelei ona faatonutonuina e le susuga i le faiaoga ia Jasmine Leota.
O lenei faamoemoe o le nofo sauni atu lea o Le Mau e tali lo latou valaaulia i le South Side Arts Festival i le aso 29 o Novema i Takapuna i Aukilani.
E ese foi le onomea o le tamaitai o Jasmine i le taimi o le taualuga ina ua saasaa i teuga faa-Samoa moni e faaiu ai lo latou faamoemoe. O le tele foi o le ausiva o tama ma teine o le a faauu i le faaiuga o le tausaga ua maua o latou faailoga i le faafiafia. Tatou talosia ia alo o le atunuu mo a latou taleni eseese ua faaaogāina mo le tautuaina o tatou tagata i aiga, ekalesia ma le atunuu.
