O le tupua taumate le mafuaaga ua toe suia ai le faaiuga a le IRB e tusa ma le tulafono na tatala e lei mamao atu, e faataga ai tama taaalo o alo ma fanau Samoa, ua lē agavaa i le filifiliga a aufili a atunuu o loo taaalo lakapi ai, ona saili avanoa mo le Manu Samoa, i tapenaga o le Ipu o le lalolagi, le Olimipeka i Rio faapea taamilosaga a le taitoafitu a le IRB.
Peitai o le faaalia o le agaga faanoanoa o se tasi o tama lakapi Samoa, i luga o upega tafailagi Fritz Lee sa taalo mo le ‘au a le Chief i le Super Rugby, faatasi ai ma le tele o faaseā ua lagalagā ai manatu faaalia o tagata i le toe suiga faatopetope o tulafono a le IRB, i ona teuteuga ua faafaigata ai nei ona agavaa tamaiti Samoa ma le Pasifika mo se avanoa e taaalo ai mo ‘au a latou atunuu, o ata manino ia o faiga faalemanuia a le IRB, e taofiofi ai nai tamaiti mai le faalautele atu o le taleni taalo.
O Lee o se tasi o tama taalo ua leva ona nofo sauni ma tapena mo lenei avanoa, peitai e foliga mai i le tulafono ua toe suia nei, ua lē agavaa ai e saili avanoa e taalo ai mo Samoa.
E pei ona silafia, o aiaiga nei o le tulafono e pei ona faamatuu mai e le IRB a o lei toe suia le tulafono i le vaiaso na se‘i mavae nei, e faapea afai o umia e se tama taalo se tusifolau o lona atunuu lona lua (second country), e lei toe taalo foi i se taaloga faavaomalo mo le 18 masina, ua agavaa lea tama taalo e apalai mo se avanoa e ta‘alo ai mo lona atunuu i taamilosaga faavaomalo a le taitoafitu o loo lumanai.
Na faamaonia foi e le Komiti o teuteuga o le tulafono a le IRB, a tasi le vae o le taamilosaga a le taitoafitu e te taalo ai, ua lava ma totoe lea e agavaa ai i taaloga o le Olimipeka i le 2016.
Ae afai foi e fia tausinio mo le ‘au a lona atunuu i soo se taamilosaga lava, e tatau ona auai i World Series Tournaments se fā faatasi ai ma le Olimipeka i totonu o le tolu tausaga.
E ui e foliga faigata le alafua na tuuina mai muamua, ae o se faamāmā avega mo nai atunuu laiti o le Pasifika e aofia ai Samoa, Tonga ma Fiti auā tapenaga o le taaloga mo le lumanai, aemaise o nai tama lakapi na tulimataia lea avanoa e ono taaalo ai mo latou atunuu e aofia ai Fritz Lee, Isaia Toeava ma Tim Nanai-Williams mo Samoa, a o Sitiveni Sivivatu ma Joe Rokocoko mo Fiti ma le toatele o nisi o tama lakapi na sauni mo lea avanoa.
Peitai na vave toe suia foliga fiafia i le faanoanoa ina ua toe sui mai fuafuaga a le IRB i le vaiaso na tea nei, ua lē tasi le vae o le taamilosaga taitoafitu e pei ona sa faataga muamua mai ona agavaa lea e apalai, peitai o lea ua siitia i le fā vae o le taamilosaga taitoafitu e tatau ona taalo ai le tama lakapi faatoa mafai lea ona faamatuu e taalo i se isi atunuu.
O se tulaga faigata tele mo si a tatou Manu Samoa, ona o le moomia tele o lea faatagaga e ono fesoasoani atu ai nai alo ma fanau Samoa i kalapu lakapi mai i fafo mo tapenaga o taaloga o loo lumanai.
Ma taumafai ina ia toe siisii mai i luga le tulaga o si a tatou ‘au taitoafitu e pei ona mae‘a le taamilosaga talu ai o loo tulaga valu, ae moomia le iai i le tulaga fā pito i luga, ina ia agavaa mo le Olimipeka i le tausaga 2016.
Atonu ua manatua ai le muagagana e masani ai Samoa, ‘e togi le moa ae uu le afa’, e pei e tatala nai tama taaalo ae mau ai lava le IRB e faatonutonu le atunuu e taaalo ai. E manatu nisi, ai ana tutu faatasi Samoa, Tonga ma Fiti ma liliu i le lakapi liki, masalo ai ua tau faalogo mai ma lagona se faatalauula atu a nai atunuu tauatiae.
