O fea tupe na avatu e tusa ma le talosaga mai?
E toatele tagata ma le mamalu o le atunuu e oo mai lava i le taimi nei, o loo tuufesili pea, ma tau saili le mafuaaga o le motusia faatopetope o le tautua a le leitio a le FM, ae lē se‘i talotalo mai ma faatofa faalelei mai i le mamalu o le au faafofoga sa fai ma ana paaga.
O loo faaauau pea ona fesiligia e le au faafofoga poo le ā le mafuaaga ua pe ai ma lē toe faaauauina lea tautua.
E lē gata ina sola gūgū le leitio ina ua motusia ana faasalalauga, ae ua faapea foi ona sola atu ai ma le alii pule o le alaleo, e leai ma se manatu i le mamalu o le atunuu sa faasoa i ai ma soona saunoa i ai i le tele o taimi o ana faasoa ma polokalame faagasolo.
Ae lē gata i lea, o le mea sili ona mate gata, ona o le tuua e le alii pule o le galuega, toe tuua ma Niu Sila ae leai ma se fesootaiga ma lana aufaigaluega sa galulue ma latou faifaimea faatasi. O le aufaigaluega o nisi lava foi o tamalii o le atunuu e iloga ma faaaloalogia i totonu o aiga ma le faalapotopotoga i Aukilani.
Ae aifilofilo ai ma nisi o auauna a le Atua, sa fesoasoani tele lo latou sao i polokalame, ma le faatupeina o le taimi i luga o le ea.
O le isi tulaga lē manuia ma le lē tamalii o lona faatinoina, o le sola o le alii pule, ae lei iai ma se tasi o le au galulue, na manino pe silafiaina le tulaga tau seleni sa maua i le taimi a o mafuta ma tautuaina le atunuu.
O tupe na māau i ai le atunuu i le taimi na tatala aloaia ai le leitio, faatasi ai ma tupe sa foai e Samoa, i leitiofoni e lua sa faatalauula ai ma talosaga i le atunuu.
Sa faamaonia mai e nisi o auauna sa galulue ai i le leitio, e moni ma faamaoni tulaga uma e pei ona faaalia e le Samoa Times. E leai se feiloaiga ma se tala a le alii pule na faailoa ane ai se mea o le a tupu. E lei faailoa ane foi pe o fea o le a agai i ai lana susuga.
A o le mea moni lava e leai ma se isi o matou sa galulue, na ia iloaina se sene apa e tasi o tupe sa tauaao i ai le atunuu e tusa ai ma sailiga seleni sa fai.
Atonu masalo na o le toatasi lava le tagata na te iloaina ia tulaga uma, auā o ia lava lena e vavalalata ma le alii pule, e masani foi ona ta‘ua a la fonotaga e fai soo.
Na ta‘ua foi e se tasi o uso sa iai i le faavaeina o le leitio, e latalata i le $8,000 le seleni na tauaao e le atunuu i le po na tatalaina ai ma faalauiloa le auaunaga.
Na faalogo foi i tala o le ualesi mosooi, e feololo lava foi le seleni na maua i le leitiofoni muamua, ae o le leitiofoni lona lua, e lei taina le sefulu i le taeao, ua tapuni le tele o nofoaga ona e leai ma nisi na toe alolofa ane i ni foai.
Masalo o le isi lena mafuaaga ua manatu ai le alii pule ua tatau ona faamuta le leitio, ona ua amata ona foliga mai ua leai se faatuatuaga i tagata, auā e lei faalauiloaina foi le aofai o le seleni muamua, ae toe tatao atu le isi pomu lona lua.
Na toe fesiligia foi le sui lea poo le ā sona manatu i le totogiina o le kamupani e ona taimi sa faaaogāina. Ae sa ia ta‘ua o le mea malosi la lena, ma e talitonu poo ā lava isi mafuaaga, a o le pogai tonu lava lena ona ua lē totogia le taimi o le ea sa faaaogāina. Masalo ana faaalu sa‘o tupe sa maua mai i le foai a le atunuu, semanu e lē vave faamutaina le auaunaga.
Sa toe fesiligia foi sui o le aufaigaluega, pe sa totogi o latou taimi sa faaalu i le po mo polokalame, aemaise o le tautuaina o le atunuu.
O le tali e leai, ae lei maua ni nai alauni poo ni penisini e utu ai a outou taavale ona o le taugata o le soifuaga i lenei vaitaimi.
O le tali e lei oo lava i ai se tofa a le tamalii e ona le leitio i lena itu, na pau lava lea o le valaau mai e o atu e faigaluega, ma fai polokalame ae sa faatupe lava e le tagata ia lona taimi.
O le isi tulaga sa faanoanoa ai le aufaigaluega, ona e lē gata i le maamaau o le atunuu sa lagolagoina ai aisiga a le leitio, ae o le itu foi i taumafa ma faaaloaloga e momoli atu i le nofoaga o le leitio i le tele o po. O le molimau a nisi sa faailoa i lea lava vaitaimi, o le naunau ina ia alualu ma solosolo manuia, aemaise ia faaumiumi le tautua i luga o le ea, peitai ua lē o lea le faamoemoe e pei ona sa momoo i ai.
E talitonu o aga lava ia ma le masani a le atunuu, o le fiafia e foai ma faataumamafa le aufaasalalau ona o le alofa i le galuega, aemaise o le lagolago i faasalalauga.
O le mea e ofo ai o le faafuasei ona mou ese ma lē toe faafofogaina le alaleo, ae lē se‘i faaleo ane sina faamatalaga e nofo ilo ma silafia ai nai tagata sa totogi sao i le faamoemoe.
Masalo ua tatau nei ona sui le alagaupu e masani ai le atunuu pe a latalata ina faaiu ni faiga mea poo se mafutaga. ‘E lē tuua faapo evaga lo tatou po, ma o le a matou le sosola faa ia o le po’.
O se tasi lea o alaleo sa matuā mamafa lana ta pe a oo i le taimi o lana faasoa ma finagalo o le atunuu. E masani ona upuupu tetele ma fasifasi tagata e ala i saunoaga ma fetalaiga, peitai ua taunuu i se taunuuga e lailai mai ai le ituaiga tofa ma le ituaiga faatautaiga sa fofoa ai ma faafoe polokalame i luga o le ea.
Sa taumafai lava ina ia maua pea se fesootaiga ma uso a faasalalau, sa masani ona feagai ma le atunuu i le tele o taimi, ma fesiligia pea i so latou finagalo.
Ona sa iai lava le manatu a nei a lē toe faia le ta, ona ua see le sa ma sa lagolagoina malosi foi e le mamalu o Samoa le faamoemoe i le taimi muamua sa amata mai ai.
E oo lava i le taimi na matou le toe feiloai ai ma le afioga ia Vui Masināmua, e leai ma se isi na malamalama, pe na iloa le aofai o le maamaau o Samoa.
Na pau le tulaga na matou iloa, sa fai le faalavelave o le aiga o le alii pule, ina ua mae‘a le leitiofoni muamua, ma e lei faia ai lava ma se tala o le tupe ina ua mae‘a le maliu sa fai o le alii pule.
Ia e lē fia faia i ai se faamatalaga i lena taimi ona ua mavae, ae masalo lava sa totoo ma faaaogā e Vui le seleni a le atunuu sa aumai ona o le faaleleia o le leitio.
Sa fesiligia foi sui faasalalau, ona o le latou aiā tatau e aiāina ai le seleni e aunoa ma le faapouliuli e le alii pule, na o ia lava auā o loo galulue ma faatino le tautuaina o le atunuu.
E lei tutoatasi foi na o le pule i le taimi o le sailiga seleni, peitai sa tutufaatasi ma le aufaigaluega.
O le tali a sui o le leitio e faapea, e faigata tele ona talanoa ma fono ma le alii pule, e tau saili lava se avanoa se‘i faaleo i ai se manatu, peitai e pisi lava ma e lē fia talanoa foi pe a fesili atu i ai i le tulaga o seleni.
O le isi vaega sa saunoa i ai le alii pule, sa ia faapea mai o ia e toe fia foi i Samoa, ona o lona faamoemoe e fia tautua lava i le malo e ala i upufai ma le tulaga o polokiki.
O le taimi nei ua maua tala ua toe foi le susuga i le alii pule i Ausetalia, ae lē o Samoa e pei ona ia saunoa mai ai.
E iai foi le isi sui o loo nofo lava i Niu Sila, e masani lava ona talanoa i ai le alii pule, ma e manatu na o le pau foi lea o le tagata, sa ia silafia lelei se aofaiga o seleni sa maua, aemaise ai o se faamoemoe o le alii pule na mafua ai ona lē toe faaauauina le tautua a le leitio.
