O le lipoti lata mai a le Faletupe Tutotonu o Samoa ua manino ai o tagata lava o Niu Sila o loo tele lo latou alolofa mai i aiga i Samoa nei e ala lea i tupe faamomoli ua maua i masina uma.
O le masina o Me ua vaaia ai e $10.3 miliona tala Samoa lava ia na maua mai i tupe faamomoli mai i Niu Sila.
O le aofai atoa o le tupe maua mai i tupe faamomoli e $25.7 miliona tala o se siitaga lea e tusa ma le valu pasene (8%) mai i le masina o Aperila tusa lea ma le $1.9 miliona tala le faasiliga i totonu lava o ia masina. I le tausaga faaletupe ua mae‘a atu e silia i le $300 miliona tala le tupe na maua e aiga i Samoa nei e ala i tupe faamomoli, ma o se vaaiga lenei ua mautinoa ai le tele o le alofa sasaa mai pea i aiga i atunuu mamao.
O le isi tulaga ua matauina ai le tele o le tupe faaopoopo i lenei alagatupe tele a Samoa, o le numera o tagata mai i Samoa nei ua malaga atu nei i Niu Sila faavaitaimi i lalo o galuega lē tumau lea ua maua i lenei vaitaimi.
E ui o lena foi ua laga faamasinoga ia i latou i Niu Sila ua taufaasese ma laititi le tupe e totogi mai i nai tagata o si o tatou atunuu ma isi tagata o atumotu o le Pasefika ona o ia galuega, ae o loo manino lava le fesoasoani i le tausiga o aiga i totonu o Samoa nei.
E mautinoa o le a laititi le seleni maua mai i le vaitau o le taumalulu o loo feagai nei i lenei vaitau o le tausaga, ona ua tele ina mālōlō foi galuega o le tauina o fua o laau i Niu Sila ae o loo faaopoopo pea lava le alofa mai o aiga o loo nonofo ai i itu eseese o lea atunuu mo aiga i Samoa nei.
O le isi tupe tele na vaaia foi le oo mai i faamomoli, e aumai i aiga o loo nonofo i Amerika Samoa ma Ausetalia.
Ae i Amerika Samoa o lea ua amata ona faamavae nisi o aiga ma ua agai mai i Samoa nei ona ua faamalolo galuega a le toatele sa tautua i falei‘a tuuapa e pei o le Samoa Packing lea ua tapunia ma le StarKist Samoa lea ua amata ona vāea ona tagata faigaluega.
E ui i nei suiga ae ua iai le manatu o le Faletupe Tutotonu, e mae‘a foi le tausaga faaletupe lenei ua faagasolo ua silia i le $300 miliona tala le tupe maua a tagata ma aiga o Samoa mai i seleni faamomoli.
