Fesiligia pea faaiuga a alii faamasino i taaloga e lua i le va o Monte Barrette ma David Tua
Ua toe atili tele, ma toe faaopoopo isi mau fesili, ae lei talia lava le anoano o isi foi mau fesili sa tulai mai talu ona mae‘a le fusuaga sa faia muamua i le tausaga talu ai.
Na lei toe iai nisi masalosaloga o le toatele o tagata maimoa ina ua pa‘ū faalua le alii o Monte Barrette ina ua matuā lē mafai ona puipui i osofaiga ma tu‘i malolosi a David Tua.
Sa manatu le toatele o le iuga lea, ma ua lava lea vaaiga e tali ai le mau fesili sa gugulu ai pea ma nenefu nisi aemaise ai o le ‘ai lea mo le sailiga malo a Tavita.
Peitai na vave ona gūgū faafuasei ma mou ese atu lagona o le fiafia ma le alagaina o le manumalo mo David Tua, ina ua tolaulauina le faaiuga a alii Faamasino ma sa logo eseese faameataavili ina ua toalua e lagolago ia Monte Barrette, ae toatasi sa manatu ia David Tua.
O se po na matuā suia faafuasei lagona o le fiafia, i le faanoanoa i le toatele o tagata Niu Sila ma Samoa lava ia, ona sa maualuga le manatu, ua manumalo David Tua, peitai sa leai lea.
Na faigata ona ta‘ape le autusitala ma le aufaasalalau ina ua mae‘a le taaloga, e oo lava foi i le toatele o nisi, sa talatalanoa ai lava ma fefaaaliai manatu ona o le tulaga ua oo i ai lea taaloga ua leva ona tulimatai i ai. O le mau a le toatele o uo tusitala ma faasalalau i televise ma nusipepa a Niu Sila, ina ua talanoa ma faasoa, sa ta‘ua ai e nisi, e lē o se faaiuga lea sa manatu i ai. Sa iai lava le talitonuga a o lei faia le taaloga e malo David Tua, ae sa toe faaopoopo lea talitonuga ina ua matuā lavea ma palasi i lalo le alii o Monte.
E tea lava le tasi agai i le lua o le taeao lava lea, o loo miomio ai lava le toatele o le autusitala ma le aufaasalalau, ona o le lē uma o tala i le taaloga.
O le feiloaiga foi sa faia mulimuli ina ua mae‘a le taaloga, sa matuā tu‘i fesili ai alii taalo e toalua, faapea le alii e toatasi o loo avea ma Promoter, Cedric Kushner. Sa toe fia iloa pe o le ā le isi laasaga mo David Tua, faapea foi le alii o Monte, ae lē gata i lea, ae pe toe iai se isi taaloga e toe faia i le va lava o alii taalo e toalua.
Ae toe foi pea ma tulituliloa le fesili, Pe aisea lava na tuai ai ona osofai ma gaioi Tavita i lana gaioiga masani. Sa manatu foi le toatele, ana osofai Tavita i taamilosaga muamua o le taaloga, e lē uma le sefulu ma le lua o taamilosaga.
O le faitau a nisi sa oo lava ina fesiligia agavaa o lē a sa avea ma faatonu o David Tua, auā o le mau faatama taalo ma i latou e silafia lelei lea galuega sa ta‘ua ai, o ia tonu lea sa tatau ona ta‘u ia Tavita le ata atoa e faia i le taaloga, e fuafua i le tulaga na iai lea po.
Na tuusa‘o le fesili ia David ma lana faatonu le alii o Chris Martin, peitai o le tali mai a Tavita, sa fiu e tau faaoso le lagona ma gaioiga e pei ona ta‘ua, peitai sa lē mafai ona koneti, ma sa faafaigata pea seia oo lava i le taamilosaga ono ma le fitu. Atonu o le ata atoa lea sa vaaia i le taaloga mai lava i lona amataga.
Pasi le suega a Monte Barrette
E tolu igoa sa faaigoaina ai e Monte Barrette David Tua. E faamalulu atu foi i le aufaitau ona o le gagana sa faaaogāina e le alii taalo atonu e aafia ai se finagalo, peitai e iai le uiga sa mafua ai ona faaaogāina e Monte ia upu, ma e lei āfaina pe leaga i lona manatu lona faatusaina o Tavita.
O le gagana faatama taalo lava ma lona talitonuga faatagata taalo ia David sa mafua ai ona ia faaaogāina upu e tolu e pei ona ta‘ua i lalo. Aua ne‘i āfaina ai se finagalo ma se manatu o se isi.
David Tua, He is a Beast, He is an Animal, He is a Bully
O le tautinoga a le alii taalo o Monte, e tolu masina sa na o le suesue lava ma matamata i taaloga a David Tua.
O se taimi umi, ma sa ia iloa e lē faigofie le toe foi mai a Tavita i le taaloga lea e pei ona faataunuuina.
Sa vaai mamao ma tapena i ai, ma sa ia fia maua tonu, poo le ā le ituaiga taalo e mafai ona faasaoina mai ai.
Sa ta‘ua e Monte o Tua o se tagata matautia ma o se tagata uigaese i lona talitonuga ma lana vaai faatagata taalo.
O ia foi o se manu se‘i tulou, i le ituaiga taalo o loo faatino ai ana gaioiga. Ae le gata i lea o ia foi o se tagata e pei o se masini, ma e ao ina faaeteete i ai.
Sa ia faatusaina foi David Tua, i se tasi o alii siamupini sa iai o le lalolagi, o Mike Tyson.Fai mai Monte sa ia iloa lelei e tatau ona taalo agai i le itu agavale o Tavita ina ia taofi ai le faalava matautia ma le malosi e masani ona lavevea ma palalasi ai i latou sa taaalo muamua ma David.
O lana lea metotia e puipui ma e mafai ona taofi ma aua ai ne‘i maua se taimi e lavea ai i le left hook malosi o se auupega a David Tua.
A o le autū o le saunoaga a le alii taalo sa ia tautino ai i le autusitala ma le aufaasalalau, o ia a o lei malaga mai i Niu Sila i le vaiaso talu ai, sa ia tatalo ai i le Atua, ma ia faapea atu i ai, Ua uma la‘u tapenaga, ae ou te manao e te fusu mo a‘u faamolemole, e tuuina atu la‘u taaloga ia te oe. O se luitau sili lea i lea afiafi ona sa ia tautino o lona manumalo lea.
David Tua
E lē lava le palasi ma le faitauina o upu a Monte Barrette, e suia ai le faaiuga a alii Faamasino, ma tuuina atu ai le manumalo ia Monte.
O se taimi muamua lea ua lavea ai le mata poo le fofoga o Tavita talu ona amata mai lona soifua taalo i fusuaga. Sa ia ta‘ua e faapea, ina ua lavea lona mata, sa ia faapea ifo, o lea faato‘ā oo i le lalolagi o le taaloga o faipelega.
O le ta‘e o le mata o se vaaiga masani i soo se tamafusu, peitai o le tele o ana taaloga e lei mafai lava ona oo se tulaga faapea ia te ia.
O se lagona sa ia taliaina auā e lē ese ia ma isi foi tama taaalo. Ae sa taumafai malosi i le mafai e gata ai lona mafai ina ia manumalo i le taaloga lona lua ma lona uso ia Monte, peitai ona ua pau o le faaiuga ua oo i ai le filifiliga a alii faamasino.
Sa iai lona manatu ma lona talitonuga ina ua palasi ma tigaina Monte, ua lava lea e suia ai le faaiuga o le taaloga, peitai e foliga mai e lei lava i le vaai a faamasino.
Na manumalo Monte i ‘ai i le tele o taamilosaga, ma na ou iloa, ona pau le avanoa o le tu‘i oti loa ina ia manaumalo ai.
O lona taumafai ma lona malosi sa iai sa faatino ai lea manaoga ma e ui ina sa taunuu, ae ua lē lava lea e suia ai le taunuuga e pei ona fofogaina.
E lei faailoa foi se finagalo o le tamalii o le atunuu, i se isi laasaga o le a oo i ai, peitai sa ia tautino lava, atonu e iai nisi mea tāua o loo totoe mo ia e tatau ona faaauau ai lona taumafai ma lona soifua auauna i le Atua ma lona atunuu.
O le finagalo foi o le alii Promoter o Cedric Kushner, e lē o mafai ona iai se isi fuafuaga mo le taimi nei, se‘i vaganā ua mae‘a se feiloaiga ma nonofo i lalo ma David Tua ma talanoa, ona faato‘ā maua ai lea o se isi faaaliga mulimuli.
O Cedric o le Promoter a David Tua ma le alii o Monte Barrette.
