Faasoa tamaitai o le lalolagi i Samoa

E fesootai uma lava pe a oo i faafitauli, o le lagona lea na laga i le fono tele faavaomalo na talimalo ai le aufaigaluega i Faletua faapea ai tiakono ma sui o Ekalesia Kerisiano i Samoa i tamaitai mai i atunuu eseese o le lalolagi na malaga mai i Samoa i le vaiaso na tea nei.
O se fono e ta‘i tolu tausaga ma faatautaia i soo se itu o le lalolagi ae o le tausaga lenei ua talimalo ai Samoa. O tamaitai Kerisiano ua tuufaatasia i le faanaunautaiga ina ia iai foi se latou galuega e faatino i le mau faafitauli o loo fetuleni mai i le suiga o lenei vaitau ma uiga o tagata o lea atunuu ma lea atunuu.
O Samoa lava ia o lea faato‘ā 15 tausaga o fai ma sui o lenei faalapotopotoga ua faaigoaina o le Bridge Builders poo tamaitai ua tutū faatasi e fausia fesootaiga.
E fesoasoani e faatalatalanoa faafitauli, e pei o sauaga faasaga i tamaitai poo teineiti. O faafitauli i le maitaga laiti o teineiti, fesoasoani i sauaga faasaga i tina.
Tatalo ma talanoa i isi mataupu ua faapea ona aafia ai fanau teine a le lalolagi ae e faaaogā le tomai faafailotu, le tomai faa taitai o le talalelei e faasoa ai soo se faafitauli ma auala ua mafai ai e tamaitai o lea atunuu ma lea atunuu ona tali atu ai i nei faafitauli.
Na maua i lenei mafutaga o loo iai lava nisi o loo lalafi i tua o tu ma aganuu a atunuu eseese e faatino ai le faalealofa ua faia i fanau, ma o le lē talanoaina o ia mataupu ua foliga mai ai ua salu i lalo o le kapeta faafitauli ma faaauau lē leoa ai lava.
O le unai o tina o le lotu, ia aveese ni pa puipui e ono faigata ai ona oo atu le feau tāua o loo tau momoli ma le fesoasoani e mafai ona ofo i tamaitai ae ia unai le malosi o tamaitai e mafai ai ona o latou tutū faatasi ma ofo atu le fesoasoani.
E 17 Matagaluega o le Mafutaga a tina o le Ekalesia Faalapotopotoga Kerisiano i Samoa ua faatasia i lea Faalapotopotoga. I se faatalatalanoaga ma le failautusi o le Bridge Builder i Samoa, Fua Lelevaga, na ia ta‘ua ai, o atunuu uma o loo feagai ma faafitauli eseese.
O le agaga lava o lenei Faalapotopotoga ina ia faaleo mai e i latou o loo aafia i soo se faafitauli tulaga o loo mafatia ai.
O se taumafaiga foi ina ia galulue soosoo tau‘au tina o atunuu uma ina ia fesoasoani ia i latou o loo aafia i soo se faafitauli ma ia galulue faatasi ma savavali i auala faale-Atua o le tali lea o faafitauli uma.
“E mafai lava ona foia ia mau faafitauli uma ma e tasi lava le tali o le fesoasoani mai le Atua,” o se saunoaga lea a  le faletua o le faifeau Toeaina, le faletua ia Fua.
Na ia saunoa foi, o le tele o tagata Samoa na o le faitio lava ae e lē o iai se fesoasoani e galulue faatasi ai ina ia foia ia faafitauli. O le sini ua faaautu i ai le Fonotaga o lenei tausaga, o le alofa, faaaloalo ma faamalosia tina o le Atua.
O le tausaga e 1996 sa faatasi ai Samoa i lea Faalapotopotoga ma avea ai loa ma sui, ma o le taimi muamua lea ua fai ai i Samoa nei lea Fonotaga. O atunuu ua mafai ona auai mai e aofia ai Ausetalia, Niu Sila, Taiwan, Hawaii, Amerika ma Samoa.
E lei mafai ona auai mai sui o isi atunuu o le Pasefika ona o ni tuatuagia lē maalofia. O le Fonotaga lona ono lea sa usuia i le vaiaso nei i Samoa i le Fogafaleono a le Ioane Viliamu.
O le isi fonotaga o le a faia i le tausaga e 2014 o le a faia ai i Niu Sila, ma o le a auai uma ai sui o le Faalapotopotoga mai itu uma o le lalolagi.