O tagata faigaluega a le Malo sa filifilia ma tofia i lalo o tulafono o galuega o loo pulea e le Komisi poo le PSC e lē tatau ona aafia i ni gaioiga faapolokiki. I se isi faaupuga, e lē tatau ona lotolotoi ma aafia i faiga tau upufai o Malo a o auauna mo le atunuu e ala i galuega a le Malo.
Sa tele faitioga mai le atunuu faasaga i tagata faigaluega a le Malo i lo latou aafia i faiga faapolokiki ae ua lē tuma‘oti ai lana auaunaga i le tutusa uma o tagata i le faatinoina o o latou tiute tauave.
Ua faaalia e se molimau faatuatuaina, o loo silasila nei le Malo i le tofia o ni tagata e iai agavaa ma tomai i le faia o galuega faafaufautua i matafaioi tau upufai o Malo poo polokiki, e galulue i le faia o fautuaga mo Minisita o le Kapeneta.
Na faaalia e le molimau, o se faiga talafeagai lea o le a tutoatasi ai le faatinoga o tiute o tagata faigaluega a le Malo.
“O se tulaga tāua tele auā o le a avatu ai faufautua e lagolago i galuega a minisita, ma ia iai ma ni tagata e galulue faaofisa mo le faia o gaioiga uma e fesootai ma le pitolaau a le minisita o se faigamalo o loo tauaveina le pulega o le atunuu”.
O tofiga faapolikiki poo political appointments, e pei ona faaalia e le molimau o le a tuusa‘o mai lava i le kapeneta le faatinoga o o latou tiute, ma e lē toe ninia faatasi ma tiute o loo faatinoina e tagata faigaluega.
O pulegamalo a atunuu o Niu Sila ma Ausetalia e iai lava i latou ua ta‘ua o political advisors e galulue mo le faia o fautuaga faapolokiki i minisita o le Malo i le faatinoina o galuega ma atiina‘e i lona tulaga tau upufai o Malo, e ese ai mai le pitolaau e faatino e tagata faigaluega a le Malo. Ua faaalia e le molimau faatuatuaina, afai e oo i le taimi o le a mautu ai lea fuafuaga, o le a sailia loa nisi e faatinoa ia tiute.
O le faia o ni faufautua o se taimi muamua lea o le a see atu ai Samoa i lea suiga, ma o se suiga lelei o le a maioio ai tiute tauave o Matagaluega ma Faalapotopotoga a le Malo, ma ta vavae ese ai faiga faapolokiki mai le aafia ai o tagata faigaluega.
O le tulafono sili lea ona manino i aiaiga o galuega a soo se Malo temokarasi, e lē tatau ona aafia tagata faigaluega a le Malo i ni polokiki.
Ua faalia e le molimau e iai nisi ua laumanu‘ia suafa o le a faaono faia i ai se filifiliga a le Malo mo ia tiute tāua. E lei faamautuina pe o le a ta‘i fia faufautua poo political advisors a se minisita, ae e iai le faamoemoe o le a faamautuina uma ia vaega pe a mautu se finagalo o le Malo i lea fuafuaga i le faatino poo le faataatia mo se isi taimi.
