E faafeiloai atu i le agaga faaaloalo i lenei foi vaiaso. Talofa lava. Alo mai, se‘i o tatou talatalanoa i le taitai malosi e faaaogaina e le Atua.
Silasila i le Iosua 24:
E tofu lava i tatou ma le malamalamaaga poo le faauigaina o le upu taitai. E mafua mai lea i le siosiomaga o loo e iai poo le tupuaaga foi. O nisi ua masani ma taitai lelei ma mautu. A o nisi ua afaina ona o le kuluku o taitai.
I totonu o le Tusi Paia tatou te iloa ai le tele o ituaga taitai atoa ai ma auala eseese e faatautaia ai le taitaiga. Ou te manatu se‘i o tatou vaai i le soifua o se tasi o taitai lauiloa o le Tusi Paia. O se taitai toa ma faaaogaina e le Atua e taitai lona nuu.
O Iosua na avea o ia ma taitai a o i lalo o le taitaiga a Mose. O nisi nei o vaega taua i le soifua o Iosua ou te talitonu e tatau ona maua uma e taitai.
1. Loto maualalo
A o lei avea Iosua ma taitai o le Nuu o Isaraelu, sa ola usiusitai o ia i lalo o le taitaiga o Mose. E 40 tausaga na ola auauna ai Iosua ma ia faataunuuina faatonuga a Mose. O ia lea na avea ma lagolago poo le fesoasoani i le taitaiina o le Nuu o le Atua. (Esoto 24:13)
O se tulaga taua lenei i soo se tagata o fia avea ma taitai. Ia iloa ola auauna. O le taitai o le tagata e ola auauna.
E pei ona ta‘ua i nisi o tusitusiga ua mavae, afai o e sauni e tofi ni taitai fou, ia saili i tagata o loo auauna ma tagata e fiafia e auauna i isi.
O le ola auauna e mafai ai ona gausia e le Atua le loto maaa o le tagata ma sauni ai le taitai o le lumanai ina ia aua ne‘i faafefeteina o ia pe a oo ina manuia le taitaiga ma tele mea e faia e le Atua.
A avea le tagata ma taitai ae lei a‘oa‘oina o ia i le loto maualalo, e ono tu ma le pule ma sasa. E ono faafefeteina lona loto. E ono faasausili ona uiga ma le fia faalogo i se fautuaga.
O le tagata loto maualalo, a oo foi ina tofia i se tofi taitai, e le tuua ai le ola auauna. E faaauau pea aua ua masani ai. E pei o le galuega e faia I le tamai solofanua se‘i tulou. Ae lei avea ma solofanua e galue, e muamua ona gagau le amio.
E gagau le amio e ala lea i le ola auauna, ola i le loto maualalo, ola usiusitai i faatonuga, aemaise le onosai i lalo o puapuaga ma tiga. O ina e koleni ai le taitai fou mo le galuega.
Na faaeaeaina Iosua e le Atua i le vaaiga a tagata ina ua faia e ia le vavega o le vaeluaina o Ioritana. E lei mimita ai o ia ae na ola pea i le loto maualalo.
O Saulo le taitai na faatoilaloina ona o le faamaualuga o le loto. O le Upu a Samoa e faapea: “O le ala i le pule o le tautua”. E ese le manaia o lea faaaupuga pe a mafai ona faataunuuina e Samoa e ala i ana tu ma aga.
O le Pule e le o se mea e soona faasoaina. O nei ona po ua tuuina atu le pule e aunoa ma le tuuina atu o le tiute. I se isi faaupuga ua tele sifi ae ua leai ni Initia. Ua tele pule ae leai ni tagata faigaluega.
O le taitai loto maualalo e malamalama lelei i le eseesega o tiutefai ma le pule. O le Pule e te faatonu ai ae o le tiute fai e faataitaia ai. O le taitai e taulamua i le faatinoga o le faatonuga.
Ua tele matai ua tuuina atu i ai suafa maualuluga ma tofi i totonu o aiga ma afioaga, peitai e lei ui i le auala o le loto maualalo poo le tautua lea. Afai ae moni lava ma talitonu Samoa “o le ala i le Pule o le Tautua”, e le toe soona faia ni saofai. E fai lava na o i latou na tautua e tatau ona faasuafa matai.
A oo ina matai pe pule, pe taitai foi le tagata e lei tautua ma lei ola auauna, e na te le malamalama foi i le faiga o tagata i lalo o lana pule poo lalo o lana taitaiga. Na te le iloa aua e lei ui mai ai.
I totonu o le Tusi Paia ua faatonuina ai i tatou aemaise o taitai ina ia faagesegese ona faaee atu o lima. Aua ne‘i vave tofia taitai ae ia vaai toto‘a. E 40 tausaga o auauna Iosua i lalo o Mose faato‘a faauuina o ia e avea ma taitai.
Mo oe i lalo o le taitaiina a se tasi tagata, aua e te vavevave, aua foi e te naunau i le tofi ma le Pule. O le mago e ai moto ae lei pula, e oona.
2. Loto Faatuatua
Ina ua auina atu e Mose sipai e toasefulu e o i Kanana, sa faapea ona tofia ai ma Iosua. Ina ua foi mai na iloa ia latou saunoaga le mea o iai o latou loto. Ua na o Iosua ma Kalepo na faalogoina le faatuatua ia laua faamatalaga ma le faalagolago i le Atua e mafai ai ona faatoilaloina le nuu.
A palaai le taitai e ta‘u mai ai e leai se faatuatua. A faiaina le talanoa a le taitai, e leai foi se manumalo i mea na te faia ma e toilalo foi.
Tofi taitai e tumu i le faatuatua. E ese le latou vaai mai le vaai a isi tagata. A iai taitai i totonu o lau lio o taitai e faiaina le tautala, e ta‘u mai ai e faiaina lona mafaufau ma lona loto.
E fiu foi e taumafai le galuega e alu agai i luma ae a leotele le leo o le tagata faiaina o le a faapea ona avea ma auala e faavaivai ai tagata uma.
Na matua fetagisi uma le nuu ina ua faalogo i le faamatalaga faiaina ma le palaai mai isi taitai e toasefulu na o ma Iosua ma Kalepo.
O se tasi o galuega autu a soo se taitai, o le osofaia lea o mea faigata i se auala e mafai ai ona talepeina ma faatoilaloina.
O Iosua na faatonuina ina ia soloia i lalo pa o Ieriko. Peitai o le auala na ta‘u e le Atua ia Iosua, e lei faia muamua e se tasi. O le taitai e toa le loto e le fefe e faia mea e lei faia muamua e se tasi. Poo le a le faigata ou te talitonu e mafaia lava ona fai pe a faatuatua ma faalagolago i le Atua.
Lui Ponifasio
www.luiponifasio.wordpress.com