O le vaiaso na tea nei na faalauiloaina ai oloa gaosia mai i totonu o si o tatou atunuu o
Samoa, e pei ona faataunuu ai le galuega a le SAME i le Aso Faraile na tea nei. Ae ina ua ave i ai le talosaga a le taitaifono o le mafutaga Tuufaatasi a Kuiniselani, le Afioga ia Taulapapa Lemalu Slade ina ia maua se avanoa se‘i silasila ma tagatagai Kuiniselani i se aogā o nei oloa mo tagata Samoa i Kuiniselani aemaise o le fia manino atili, o lea na mafua ai se fonotaga sa faia i le potu fono a le alaleo a le 4EB i le Aso Faraile talu ai.
O lea na tafa ai loa le finagalo e afea si o matou pitonuu e le Afioga i le Sui palemia le Hon Fonotoe Pierre Lauofo Meredith faapea le peresetene o le SAME i Samoa le Afioga Tagaloa Eddie Wilson, auai mai ai foi le sui Hai Komesina o Samoa i Ausetali le tofa ia Fata Brian Kaio ma nisi o le aumalaga sa maua ai le mafutaga i le aoauli o lea lava aso.
O le anavatau a Perisipeni e lē mavae le fia soosoo tau‘au i lo tatou malo e ui ina motu mai ma le taula. O le failautusi lava o le Mafutaga Tuufaatasi sa fai ma fofoga o le aso, fetalaiga ia Leautuliilagi Vaatausili Tuala Tamalelagi Leapai sa faafeiloaia le aumalaga.
O le susuga ia Rev Milo Faaleava sa siitia se taulaga faafetai a o alo i le faamoemoe. O le Afioga Taulapapa Lemalu Slade sa faalauiloaina le aumalaga ma amata ai loa le mafutaga. Sa toatele sui o mafutaga eseese na auai.
E toafa sui o le au faipisinisi e aofia ai Lemalu Tuuu Patricia Sevele, Papalii Poulava Sam Matautia, Lealaisavea Sara Brunt, ma le Afioga Alofipo Vaea Lang Shu, sui o le tautua 4EB FM ma nisi o le atunuu sa mafuta atu i ai.
E ui sa lei mafai ona iloga ona toatele nisi sa auai se‘i faafofoga i le tāua o lea faamoemoe, ae iai lava nisi sa fesiligia le aumalaga e uiga i le tāua o le SAME. Sa fesiligia i le tele o fesili peitai e lei iloga lava ona ma‘oti mai poo ai o loo vaaiga auā na saunoa le Sui palemia e lē faia e le malo e le faia foi e le SAME se warehouse ae o le fesili o loo taoto pea ao ai o le a faia pe afai ae oo mai ni oloa i Kuiniselani?
Tele vaega lelei sa faafofoga i ai le atunuu i le tāua o lenei faalauiloa ma na ta‘ua foi e le aumalaga le penefiti e maua e o tatou tagatānuu pe a lagolagoina le Samoa Made poo oloa mai Samoa.
Sa fesiligia e le atunuu po ua lava tapena Samoa i le sapalaiga mai o oloa o le faataugofieina o oloa aemaise se tulaga ma‘oti e faagaioi ai oloa mai Samoa. Tele foi finagalo na faaalia i le lē mafai ona faatuina e le malo o Samoa o se warehouse e taunuu mai i ai oloa. Sa faailoa foi finagalo e ala i le tele o le sao o tagatānuu o Samoa i fafo i le tamaoaiga o le atunuu, ma le anoanoai o fesili sa tuliloaina e le mamalu o le atunuu.
Sa faamalieina lava nisi o le atunuu e ala i le tali mai o le Sui palemia aemaise le SAME ae iai pea nai fesili e lei ma‘oti mai tali i lea afiafi.
O le taumafataga sa tapena i ai le Sina World Travel. Sa avea lava le pule o le tausamaaga le fetalaiga Leautuliilagi e fofogaina se faafetai i le aumalaga ona o le avanoa ua maua. Na faaiu i le tatalo na saunia e le susuga ia Rev Milo ma ta‘ape ai le filialii ma le agaga fiafia.
