O se manatu lea o le Ofisa Sili o le ole Matagaluega o Aoga, Taaloga ma Aganuu, Falanaipupu Tanielu Aiafi ina ua laga se tasi o mataupu ua tele ina talanoaina ma ua oo lava i le faatumutumuga o le Malo ona o le tulai mai pea o faafitauli i le tau faasa‘osa‘o ai o amio a tupulaga talavou.
O le fautuaga ua faia faasaga i mātua uma, i se auala e fofo ai le tele o nei faafitauli ua tulai mai i fanau aoga i lenei vaitau.
O le amanaia e Samoa o maliega faavaomalo e taofia ai le sauāina o fanau ua molimauina ai le tele o suiga ona o le itu lava lea e faamalosia le puipuiga o fanau aemaise lava o le itu lenei ua matuā tele lava foi faiga ua afaina ai soifua o fanau i totonu o aiga ma isi nofoaga o loo iai i lea aso ma lea aso.
O sauaga e pei o le fasi ma faamanu‘alia ai fanau, o le soona lafo i ai o upu lē talafeagai, ma le sauaina i auala matagā lea ua matuā malosi ai lava puipuiga nei ina ia puipuia fanau a le atunuu.
O totonu o faleaoga i tausaga ua mavae na toatele lava fanau na aafia mai ai i le soona sasa e faiaoga ma ua tele mataupu ua oo i le faamasinoga faatatau i ia ituaiga sauaga ma ua faatuputupulaia ia lipoti i le malosi ai o le puipuiga lenei faaletulafono i fanau.
Ae ua vaaia ai ma le o faatasi o puipuiga nei ma uiga lē migao ua faaali e nisi o fanau ua manatu o loo puipuia i latou e lē toe iai se malosi o faiaoga e sasa ai e pei ona iai tausaga ua tuanai.
O le finagalo o le Ofisa Sili, e tāua puipuiga faaletulafono e pei ona faamaonia e Samoa ae o totonu lava o aiga e amata mai ai le faasa‘osa‘o ma le a‘oa‘o o le tamaititi i ana tu ma aga aemaise le va nonofo ai ma isi tagata.
“E iai le upu e faapea, o le tama a le tagata e fafaga i upu ma tala a o le tama a le manu e fafaga i fuga o laau.”
Faaalia e Falanaipupu, e lē o se itu e faamalosia ai faiaoga e fasi le tamaititi, ae o se fautuaga ina ia sasa ona o le aoaiga ma ia amanaia foi e mātua le tiute o loo fai e faiaoga, ae o le matafaioi lea a le matua, o le aoai o a latou fanau.
O le toe laga o le mataupu i faiaoga ua molia i le tulafono ona o le faaoolima i le fanau aoga, lea ua faaalia ai loa le finagalo lea o le pule sili o aoga, ona o loo taumafai e vaavaai i se auala e foia ai lea faafitauli.
Na ta‘ua foi e le alii pule sili o le Matagaluega, ua tumu Tafaigata ma Olomanu (nofoaga mo tupulaga talavou ua solitulafono) i alo o le atunuu ma o foliga vaaia ia o le olaga aoaoina ua iai nei.
I faamaumauga a le Matagaluega i mataupu ua faaoo atu o loo tuua‘ia ai faiaoga, e silia ma le valu mataupu ua faia i ai faaiuga a le Matagaluega i le tausaga lava lenei. O ia mataupu ua tulai mai ai tuua‘iga o le soona fasi o tama ma teine aoga.
Sa fesiligia le Matagaluega mo se itu e tulai ai mo faiaoga o loo tuua‘ia i ia mataupu ona e lē tutusa uma mafuaaga, ae na faaalia e Polataivao Manutagi Tiotio, ofisa sili lagolago mo auaunaga lautele i le Matagaluega o Aoga, o loo muamua lava fai suesuega a le Matagaluega i soo se mataupu ona faatoa tuu mai ai loa lea o se faaiuga talafeagai.
Na saunoa foi le alii pule sili, Falanaipupu, o mataupu faapea, e tatau lava ona tutusa faaiuga e ave i soo se alii ma soo se tamaitai faiaoga e molia atu ona o nei mataupu.
O le amanaia e Samoa o le Feagaiga e puipuia ai aiā tatau poo faamanuiaga faaletagata soifua i fanau o le amanaia foi lea e le tulafono e pei ona tele lava ina faaaogā i taimi e tulai mai ai faamasinoga o mataupu ua afaina ai le fanau i soo se sauaga poo se faiga ua afaina ai lo latou ola tuputupu a‘e.
Peitai o le tulai mai pea o misa i le va o tamaiti aoga na iu lava foi ina kaga ai e le Alii Palemia le lagona lava lea o le Alii Ofisa Sili, ua tatau ona toe vaavaai aoga i le auala lea o le toe faaofi mai o le ofe e pei ona vaaia i aoga a tama i tausaga ua tea ona o le faigata tele ona saili se fofo i le faamisa o le tupulaga.
