Faataimuaga o faamanuiaga ma le lotofaafetai

O le upu a le atunuu, “E! ua malie le toa ua malo le tau” a o le tala a le tusi e faapea, “Lo‘u Agaga e, ia faamanū atu i le Atua, o mea uma foi o i totonu ia te au, ia faamanū i lona Suafa Paia.” O le taeao o le Aso Toonai na potopoto, mafuta ma aufaatasi ai aiga lotu uma o le aulotu EFKS a le Puaseisei i Magele i Sasa‘e ma lo latou faafegaiga, le Susuga Rev. Victor Pouesi ma le faletua.

O lea aufaatasiga se‘i faamua ai mea i Matautusa e momoli ai le viiga ma le loto faafetai tele i le Atua, ina ua tali faaaliali mai i tatalo ma manaoga, ae faasilisilina ai o le alofa faaalia o le Atua e ala i taumafaiga ma moemitiga sa tulivae atu ai tagatalotu uma e ala i tatalo, auā o lele ua toe nei o se aga ona faapaiaina lea ma tatalaina aloaia le galuega o le faleaoga mo le faaaogāina e le fanau ma tagata lautele.

O se mafutaga matagofie tele sa taitaiina lava e le susuga i le faafeagaiga, Rev. Victor Pouesi i se saunigalotu sa pepese fiafia ai ma alalaga ma le loto faafetai tagata uma, ona o lenei galuega tele ma le matagofie ua tino mai.

Saunoa le susuga i le faafeagaiga, o le atoaga o le faamoemoe mo le faapaiaina ma le tatalaina aloaia o lenei auaunaga, ua fuafuaina mo le masina fou pe a mae‘a lelei feutagaiga ma le ofisa o aoga (MOE).

Sa faaalia foi le laufofoga fiafia o tagatalotu ma sui uma o le mafutaga aemaise o le limafoai ina ua alofaiva foi nai fanau laiti i nai a latou faafiafiaga pupuu auā tapenaga mo le aso tele o lumanai ai. O le faamoemoe ia mae‘a lelei galuega ma fuafuaga a le ofisa o aoga ona tatalaina aloaia ai lea o lenei auaunaga auā le a‘otauina o fanau laiti i totonu o le aai o Magele aemaise o tama fanau a le aulotu.