Tausala Team

O le tolu o vaiaso talu ai, na faia ai se a’oa’oga laveai a le Faalapotopotoga Tuma’oti a le Alofa Connection Incorporated i Sini i Ausetalia, e fesoasoani ai i le olaga o alo ma fanau teine talavou o Samoa ua aulia lo latou sefulumaletolu tausaga agai atu i luga le matutua. 

I se saunoaga a le tamatai o loo faauluulu i ai lea faalapotopotoga, le faletua ia Cecilia Seumanutafa Theodore, i le sui o le Samoa Times, le agaga ma le autū moni o le silasila o le faalapotopotoga i le faatautaia o nei polokalama. 

1. O le vaai lea i le tulaga pagatia ua oo nei i ai le soifuaga o alo teine o Samoa i uiga ma fesouaiga fou o le olaga ua i ai nei, ae ao lava ona tapenaina lo latou olaga faatamaitai Samoa mo nei suiga .

2. Ia mafai e alo teine o Samoa, ona latou sauni e faafetaiaia le malosi o nei suiga fou, e lei mafaia e nai o latou tina ona malamalama i le tele o suiga fou o le olaga o aso nei.

 3. Ia vaavaai ma tilofia  ni auala e faigofie ai ona foia ma tetee atu ai, ina ia mautinoa ai lo latou saogalemu mai toatuga o le a fetaiai ma latou i lo latou olaga talavou. 

Na saunoa foi le faletua ia Theodore e faapea, o le tausaga lona lua lenei o lea lava polokalama. O le tausaga ua mavae ina ua faasalalauina, e silia ma le limasefulu na tali mai ma sa auai ai i lea a’oa’oga faasemina sa faatinoina i ona vaega e tolu. I lenei tausaga 2019, ua faapea lava ona siisii pea i luga le faatāuaina e mātua ma e lē gata i lea o ekalesia ma totonu o aoga. 

E pei la ona auai mai ai le faletua ma teine talavou o le Ekalesia Katoliko mai le Malosi i Miami’s, lea na auai ai tamaitai talavou mai le sefulufa tausaga i luga atu. I se molimau a nisi o teine talavou sa auai ai i lea a’oa’oga, na latou molimau ai se sao tāua o lenei polokalama mo o latou olaga. Ua tele ni mea tāua ua latou maua, ma o le a malaga ese atu foi i latou, ma se oso tāua e faasoa atu i isi tupulaga teine i o latou nuu, ekalesia, faalapotopotoga ma le atunuu. 

O le Autū o a’oa’oga faasemina o lenei tausaga 2019, “O le Tausala”. O le fesili: O le ā le Tausala? Ua ta’ape ai nei le a’oa’oga ma le manino i o latou faasinomaga o Tausala Samoa. E momoli ai le agaga faamalo ma le faafetai i le tamaitai ta’ita’i o le faalapotopotoga a le Alofa Connection Inc a Sydney, ona o la latou vaai mamao auā le faatāuaina pea lea o Tamaitai Samoa, o ia ma ona tiute faale-Tausala i soo se taimi lava. Ae afai e lei maua sou avanoa i lenei tausaga, ona e mataituina lea o le taimi o lea lava foi polokalama i le tausaga fou, poo lou faafesootai sa’o o le faletua ia Cecilia Seumanutafa Theodore mo sou avanoa.