Vevesi mai tina i le toe minute o le tauvaga

E tolu vaiaso na faagasolo ai le polokalame a le Radio Samoa ua faaigoaina o le Mama’s Style e faapitoa lea mo tina uma i totonu o Aukilani. Sa tatala le avanoa i soo se matua o le tina e fia auai i lenei polokalame, ona o le agaga maualuga o le leitio Samoa ia ave lava le faamuamua i le faatāuaina o tina i le latou Aso Sa faapitoa e pei ona faamanatuina i tausaga taitasi i le masina lenei o Me.

O le tauvaga a le Mama’s Style na tuu ai le avanoa i tina uma e pue mai ai se ata video o le tina a’o faaali le matagofie o ona laei ma le manaia o ana sikaili ona lafo mai lea i le leitio Samoa e saili ai le tina e sola ma le tulaga muamua o le tauvaga. Ia aua ne’i sili atu ma le 20 sekone le umi o le ata video ae ia fai lelei foi teuga ma sikaili a le tina, ma o le tina e tele LIKES o lana video o ia lena e manumalo. 

E tele nisi faigameaalofa mo tina i tele o tausaga ua mavae, ae o le taimi muamua lenei ua iai se polokalame faapenei mo tina ma ua ese foi le maitau i le lolofi mai o tina mai tafa e fa o Aukilani e faatāua lenei faamoemoe i le faatāuaina o laei ma teuga a tina. 

O tina e sili atu i luga o le 60 le matutua sa mafuli i ai le toatele o tina sa auai i le tauvaga, ma o se polokalame tāua lea ona sa vaaia le fiafia o nai tuaa matutua e sisiva ma faaali le matagofie o latou teuga ma laei e ala i videos sa tuuina mai.

O le tele o ata video sa lē usitaia aiaiga o le polokalame, aua e iai isi ata sa lafo mai e sili ma le 20 sekone le umi, a’o isi ata e lafo mai o le slide show a le tina, ma sa lē afaina lea i le polokalame a le Radio Samoa, auā o loo iai le talitonuga o loo fia faaali lava le sisiva o nisi o loomatutua ma a latou teuga.

O le vaiaso mulimuli o le polokalame na maitauina ai e pei o le vi koli le sau o ata o tina i luga o le leitio Samoa e fia tauva, auā o lea ua latou iloa le lelei o faailoga aemaise ai o le tulaga muamua e manumalo i le 2 tickets i le malaga i Samoa ma le toe foi mai, lea sa lagolagoina e le kamupani vaalele o le Air NZ.

Ae pei ona faaalia nisi o finagalo o tina matutua ua silia i le 70 tausaga le matutua, o latou ua feita ia latou fanau, ua fiu e tauanau e pue sona ata e aumai i le tauvaga ae mumusu, fai mai e aua ne’i sau i ia tauvaga ona ua matutua, ae o latou e vinavina lava iai e fia auai i le polokalame lea mo tina ona e maua ai le fiafia ma atonu e laki ai i tickets ia e lua e alu ai i Samoa.

Ma o le vinavina tele o loomatutua ia latou fanau i ata video e pue ma o le mafuaga lea ua toe saputu mai ata i le vaiaso mulimuli o le tauvaga. Ae o le saunoaga a le tina ia Mauailegalu Ioana Sala Setiu o ia e tusa lava pe na tuai ona pue lana ata ma aumai i le polokalame ae o le mea sili ona tāua ia te ia o le maua o lana faailoga i le tulaga tolu, ae ana faapea e vave pue lona ata ma lafo mai o lona uiga o ia e sili.

O le Aso Faraile ua mavae 10 o Me na tapunia ai le tauvaga ma faailoa ai le tina ua sola ma le faailoga muamua o le Mama’s Style. E latalata i le 20 tina sa auai ae na’o le 12 tina sa fai i ai le filifiliga, ma o tina ia e tele LIKES ia latou ata lea ua see mai i luga o le 12 pito i luga.

Iuga o le tauvaga o le Mama’s Style:

• Fealofani Naketoatama – 562Likes

• Tofa Sinafatuimoana Faatamala –    

                 523Likes

• Mauailegalu Ioana Sala Setiu – 

                 218Likes

Ruby Paulo – 211Likes

• Silia Afamasaga – 156Likes

• Merry Fuifui – 152Likes

• Temukisa Ah- mann – 149Likes

• Peleseti Iosefo – 146Likes

• Sina Pe’ape’a – 142Likes

• Tuasivi Toleafoa – 127Likes

• Lesoo Savea – 124Likes

• Apiseka Ioane – 110Likes. 

O le agaga faafetai o le tina ia Fealofani Naketoatama i le pulega o le leitio Samoa ona sa leai sona manatu o ia e sili i lenei tauvaga, ae pau le agaga ia te ia o le tina ia faamaopoopo i polokalame a le leitio ma ia faatāua o ia o le tina.  E faafetai foi i lana fanau ona o le pueina o lana ata ma tuuina i le polokalame ua mafua ai ona ia mauaina lenei faailoga. Ma se’i talatalanoa i lana fanau e fuafua se aso ma se taimi e faataunuuina ai lana malaga i Samoa i lana ticket ua maua.