Ua toe laga foi le taugata o taavale e feoai ai Ofisa Sili o le Malo poo CEOs, i le manatu o le Tautua Samoa, e tele atinae o loo tau faasoa ai le Malo ae ana taugofie taavale e feoai ai faauluuluga o Ofisa ma faalapotopotoga a le Malo, atonu e tele se tupe e faasao mai ai mo isi galuega a le Malo.
“Ai lava na o le pau lenei o le atunuu e feoai ona CEOs i pikiapu o le ituaiga taugata lea o le HILUX ae ua lē agai nisi i Hilux ia e ta‘i $90,000 ae ua agai i ituaiga ia e oo atu i le $110,000 le tau,” o le faaaliga lea a le Minisita Agai o Galuega, Levaopolo Talatonu.
“Faaopoopo lea ma teuga ia ua vaaia i nisi o taavale e oo atu lava i le $150,000 le tau atoa o taavale nei ae o le tele o nei taavale e lē moomia le umia e nisi o Ofisa Sili ona e lē o feoai ma e tele ina tutū i le aso atoa i ofisa.”
“A o lea lava e fiu nisi o itumalo e faatali fesoasoani na talosagaina ai le Malo ae o le tali lea e aumai se‘i tau faasoasoa ua utiuti le tupe maua – ai ana faatau ai ni taavale taugofie atu mo CEOs ai ua maua nisi tupe faasili a le Malo.”
Faaalia foi e le Tautua Samoa, e iai lava Ofisa Sili e talafeagai le ave i ai o pikiapu auā e agai lava i nuu i tua mo asiasiga ma le faatinoga o a latou galuega, ae o le toatele lava o lea e na o le feoai ai lava i le taulaga, ma e mafai lava ona faaaogā taavale e taugofie atu.
“E tolu i le fā Tuscons e maua i le tau o le pikiapu e tasi, se‘i vaai i le tele o le tupe faasao.
E amata mai tau o pikiapu Hilux a le Asco Motors i le $80,000 ona sosoo lea o le isi ituaiga pikiapu e ta‘u o le mid-range $85,000, sosoo ai ma le ituaiga o le fully loaded e $90,000 ae o le tele o taavale ia e ave e CEOs e i le va lava o le $100,000 – $110,000. E to‘a 25 CEOs e $2 miliona e alu i taaavale nei”.
O le finagalo o se tasi o Ofisa Sili na fesiligia i lenei mataupu na ia ta‘ua ai o CEO’s uma lava o le vaega lea o ana penefiti i le faauluulu i ai o ofisa a le Malo, o le taavale ae o pikiapu e ave i Ofisa Sili uma. “O a‘u e $100,000 le tau o le taavale lea ou te fealuai ai ae e leai ni faaopoopoga o tuu i ai,” o le saunoaga lea a lea Ofisa Sili i le Iniini Samoa.
Ta‘ua e le alii Ofisa Sili e lē faitio foi i le faaseā a le Itu Agai i faaopoopoga nei auā e uma ane ua lē pei o ni taavale e feoai ai ni Ofisa Sili ae pei o ni taavale a ni tupulaga talavou.
Faaalia e lenei taitai ana tuu atu le faitalia ia te ia o lana fautuaga e sili ai le avatu o le alauni a le Ofisa Sili ona alu lava lea o ia e faatau ai le taavale e faaaogā ma e tatau ona tapulaa le alauni lea mo taavale.
Na fesiligia pe faamata na te talia se Tuscon pe afai o taavale ia e avatu i Ofisa Sili ae na ta‘ua e lea taitai, o le ā lava le taavale e avatu e fealuai o le taavale lea e faaaogā.
O le tali a le Alii Palemia i le atugaluga a le Itu Agai, e lē mafai ona ave taavale e lē talafeagai mo asiasiga e faatino e Ofisa Sili. E tele atu le tupe e alu i le tau toe faiga o taavale laiti ae malepe i le tele o asiasiga e faatino e le toatele o Ofisa Sili.
O le fai o nei tuua‘iga na ta‘ua e le alii Palemia, e lē iloa pe aisea ua lagalaga ai foi e le Itu Agai ae o loo manino lava le talafeagai ona ave o taavale nei mo i latou o loo faauluulu i ai matagaluega auā o i latou nei o loo faatinoa le tele o galuega a le Malo, ma e moomia le agai i nuu i tua ma nofoaga e tatau ona lelei taavale e agai i ai.
meri
