Na faatumulia le Community Hall i Mungavin Avenue i le Aso Sa, 10 o Fepuari i le faapaiaina o le susuga ia Pastor Saunoa Arona Taotua ma le faletua o Fuisa Taotua ona ua valaauina e le Ekalesia i Titahi Bay e fai ma o latou taitai.
O susuga i faifeau ma faletua uma o le matagaluega faapea a latou ekalesia e fitu, na aofia faatasi ai i lea sauniga mamalu, na taitaia e le susuga i le Fomai ia Rev. Dr. Peniamina Williams. Na ia laugaina le upu folafola i lea taeao matagofie.
O se lauga na matuā faatumulia i le faauuga a le Agaga Paia ona sa matuā lologo le aofia i ana timaiga ma faalaeiauga logo i tino mai le afioga a le Atua, na timaia ai le Faifeau fou ma le faletua faapea ma le ekalesia fou.
O isi na fou i la latou faafofoga na le uma le fia faalogo pea a o saunoa le Fomai i le Tusi Paia i lana matua: “Ia ou faia le finagalo o le Atua o lē na auina mai a‘u”.
O le susuga ia Saunoa Taotua, o le lupe faalele a le afioaga o Salelologa ma lona faletua o Fuisa Taotua e mai le afioaga o Fagaloa. O le susuga ia Saunoa na faauuina lona faailoga o le Bachelor of Theology i le tausaga e 2011 mai le AGAPE Bible College, ma o le taimi nei o loo saili atu mo le faailoga o le Master of Theology i Amerika. O loo ia suesue ai faa correspondence.
O si a la ekalesia na valaauina laua e fai ma o latou faifeau na faatuina i Titahi Bay, peitai i le taimi nei ua latou faaaogāina ai le Community Hall i Porirua mo a latou sauniga.
Na amata ona latou faatasi i le masina o Novema ma nai aiga e toatolu ae toafā i le faifeau ma le faletua, peitai i le taimi nei ua toavalu aiga ua iai. E iai le talitonuga o loo iai pea ni isi o loo latou fia mafuta atu i lea ekalesia e lagolago le galuega fou.
Ina ua mae‘a le faapaiaga na valaaulia ai le aofia mo le taumafataga matagofie felanulanuai na faia lea i le Maota o le ekalesia a le Bread of Life i Kenepuru. O le tofa ia Taotua Fiti Tufuga na feagai ma le faasologa o le polokalame ma o ia foi na fai ma fofoga o le ekalesia ma aiga na lua e molimoli ni meaalofa mo le vasega o faafeagaiga faapea malo faaaloalogia na auai mai i isi vaega o le atunuu.
E avatu ai foi le faamalo i lea alo o le atunuu ua filifilia mo le galuega a le Atua. Ia manuia le galuega fou.
