Na tulai mai se faafitauli i se tasi o tatou aiga Samoa, i se taimi lata mai nei. O lea aiga sa fai le feagaiga, e tusia i le laupepa e tasi, ma se aiga papalagi, sa faapea latou te va lelei tele lava.
O le faaupuga o lenei feagaiga, e tele mea e lē o fetaui ai i le tulafono, poo feagaiga fai mo le faatauina o se fale. Ae ui i lea sa faamaoni pea lenei aiga e totogi le tupe o tusa i lenei feagaiga, latou te faatau ai le fale, i ni tausaga se tele.
O lenei aiga latou te lei sailia se fesoasoani a se loia poo se isi e tomai i matupu tau feagaiga tusitusia, i le tulafono, a o lei sainia le feagaiga.
O le mea ua oo i ai, ua atoa le 8 tausaga o totogi le tupe ma faamaoni lenei aiga i le feagaiga, ma ua toeitiiti lava maua le tau atoa o le fale. E tusa ua ua 80% ua totogi e lenei aiga e faatau ai le fale lea latou te nonofo ai, i nei tausaga e tele.
Ae pagā lea i le faaiuga o le tausaga e 2009, sa toe sau ai lē e ona le fale, ma aumai le isi feagaiga e saini e lea aiga. O le feagaiga o le 2009, o le feagaiga e sui ai le faatauga o le fale, i se feagaiga e faapea o le fale o le fale rent.
Ona o le va lelei o lenei aiga Samoa ma le papalagi e ona le fale, sa saini e Samoa le feagaiga lona lua.
Ua tele loa aitalafu a le papalagi e ona le fale, omai loa sui le feagaiga i luga o le feagaiga rent. Sa iai le faaupuga na tusi lima e le papalagi e faaupu mai ai o le feagaiga lona lua, ua sui ai le feagaiga muamua.
E lē gata i lea ae ua alu le papalagi i le loia, ua tagi i le tulafono, e aveese le aiga Samoa, ma totogi atu e le aiga Samoa le $7,000 fai mai, o le rent ua tuai ona totogi atu.
Le mea leaga o le faamoemoe i ni faigauo e fai ai pisinisi
O mea nei ou te fautuaina ai i latou e faitauina lenei tusitusiga:
Aua le faamoemoe i le laumata fiafia ma le suamalie o tala a le tagata o loo fai le lua feagaiga. Aemaise lava se feagaiga o le a alu ai ni tupe se tele.
E vave le taufaasee ma le taufaasese pe a vaai atu le tagata e ona le fale, e te lē o popole e saili se fesoasoani a se loia, e faatonutonu atu ai mea e tatau ona tusia i le feagaiga, a o e lei sainia.
E sili le puipuia i lo le togafitia. E taugofie mamao le totogi o se loia i le amataga, e fesoasoani ia te oe, e faaupu lelei le feagaiga osia, ae e te lei sainia le feagaiga. E te saini loa, o lau saini ua faamaonia ai faapea ua e malamalama i upu uma o le pepa lea ua e sainia.
A iai se suiga o se feagaiga ua uma ona saini, aua le na ona ave atu o le feagaiga lona lua, saini loa ae lē faitauina.
Tusa foi pe uma ona faitau, e tatau lava ona saili se fesoasoani mai se loia na te fautuaina oe i uiga o upu ninii ae e te lei sainia le feagaiga. O upu ninii i feagaiga e lē o se mea faigofie ona malamalama ai. E lē o se mea e tatau ona faatopetope le faitauina, ae tatau ona talosaga e tuu le feagaiga ia te oe, se‘i saili se tou loia e fesoasoani e faamalamalama atu le tulafono, ona saini ai lea.
Afai e te saini e te lei sailia se fesoasoani, o inā e te ta‘u atu ai i le tagata lea e fai le lua feagaiga, o oe o se tagata e faavalea gofie. Pei la o le mea ua tulai mai nei i lenei aiga Samoa ua lusi lenei tupe tele talu ai le faatamala.
E lelei le faamoemoe i le fesoasoani a fanau na fananau i Niu Sila, pe afai e lava le tomai o tou alo ma fanau i mea tau tulafono.
E lē na o le gagana le mea e nofouta i ai, ae o le tulafono (the law). Ua vave lava le sisio o le papalagi ma fai mai e malamalama le aiga Samoa ona sa faaaogā le alo sa fanau i Niu Sila e fai ma sooupu.
Aua le sainia ni pepa ona alu lea ma le tagata lea na alu atu ma pepa. Ae a saini se pepa, ia e tausisi e tuu sau kopi. Afai e iai ni mea e fesuai pe kolosi ese, ia tago e tusi ai ou initials ma fai i le tagata lea e fai le lua feagaiga e tago e initial mea ua faaopoopo ma fesuiai. Ia nofouta.
Afai o se tagata e lē faamaoni lea e fai le lua feagaiga, e mafai ona alu le tagata fai ni fesuiaiga i luga o le pepa, auā o la ua uma ona e sainia. O le mea lena o le a tele ai le faaletonu o loo tula’i mai i o tatou tagata, o loo faaseseina.
Aua le faia mea tau pisinisi e aafia ai ni tupe totogi, i luga o ni faiga masani ma le faauo. E lelei lava le tausisi e tusitusi uma i lalo mea uma sa malilie i ai. Aua le sainia i le taimi lena.
Fai i le tagata lea e fai le lua feagaiga e tuu mai se avanoa se‘i saili ai se fesoasoani ma se fautuaga mo oe. E lua mea e lelei ai le tulaga lea pe a e uia:
E faailoa atu ai le tagata lea e osi le lua feagaiga, e te lē faatamala. E lē soona faia se mea ia te oe auā o lea e iloa e iai lau loia lea o le a fesoasoani mo oe.
E iloa ai foi e le tagata lea e osi le lua feagaiga, e nofouta e lē soona tuu ni faaupuga i le feagaiga na te iloa e lē talafeagai ma le tulafono.
Afai sa fai se feagaiga e faatau le fale ma ua tele tausaga o totogi tupe e faatau ai le fale, aisea ea ua toe saini ai le isi feagaiga lona lua lata mai nei, e aunoa ma se saili o se fesoasoani?
E sili le puipuia i lo le togafitia. E taugofie ma faigofie foi i se loia ona fesoasoani e puipui oe i le amataga, ae lei tutupu mai faafitauli.
