Sa avea le tatalaga aloaia o le Taamilosaga Faava-o-Malo o le Lakapi taitoa 7 a Malisi Sagato Iosefo i le faaiuga o le vaiaso ua tuanai atu nei ma auala ua sasao mai ai loa ma le lē malie o loo laga pea e le Taitaifono o le Lakapi i Samoa, le Alii Palemia i le tulaga o iai le ‘au a le Manu Samoa ma le galuega o loo faatautaia e laufali o lenei taaloga.
O le tulaga e pei ona sa iai le malolo o le aulakapi taitoa 7 a Samoa i taaloga a Malo o le Taupulega, o le mafuaaga ua toe to manatu ai le Taitaifono pe faamata o se mao lea na manumalo ai Samoa i le Lalolagi i le taamilosaga faato‘ā mae‘a atu nei.
Ta‘ua e le Alii Palemia o taaloga a Malo o le Taupulega lea na faato‘ā mae‘a atu na malolo leaga ai lava le ‘au a Samoa ae o se taamilosaga e laititi mamao le numera o atunuu e tausinio ai pe a faatusatusa i le sailiga o le Ipu o le Lalolagi lea na faasavali i le tele o atunuu lea taaloga o le Taitoa 7 o le Lakapi ma siamupini ai Samoa.
Ta‘ua e le alii Palemia e manaomia tele e le ‘au a le Manu Samoa 7s ni Uale Mai se toavalu ona faato‘ā mafai lea ona ausia le manumalo e pei ona molimauina ai taumafaiga a le ‘au a le atunuu i le taamilosaga a le IRB, le Pulega o le Lakapi a le Lalolagi.
O ni lu‘i ia ua faia pea e le Taitaifono o le Lakapi i Samoa ona o le manaoga e tumau ai pea le maualuga o taumafaiga a le ‘au a Samoa i taamilosaga faapenei faavaomalo.
E ui i lea sa iai lava nisi i lea faatasiga na manatu ua melea e le Alii Palemia le tautiga o fanau a le atunuu ma e lē tatau ona soona saunoa faapea e faatatau i le tigaina o le ‘au, aemaise e lē faapea o le a manumalo lava i taimi uma.
Mae‘a le saunoaga faatatau i le Manu Samoa, sosoo ai loa ma le faaaliga o lona lē fiafia tele i le lē toe iai o se laufali mai i Samoa nei ua mafai ona faatautaia ni taaloga faavaomalo.
O lana upu na tuu atu i le Asosi o Laufali a le atunuu, ua na o laufali faavasivasi lava o loo mafai ona faatautaia taaloga i Samoa nei. “O le faavasivasi lea o loo vaaia lava i le faatinoga o taaloga lakapi i lona atina‘ega,” o se saunoaga lea a le Alii Palemia.
O le susuga Tulouna, o le faauluuluga o le Asosi Laufali a Samoa na ona ‘ata lava ia ua tapa sona finagalo i lea saunoaga a le Alii Palemia ma ia faapea mai, e lē o se taimi muamua lenei ua saunoa ai le alii Palemia i le manao ina ia iai nisi o le Asosi Laufali a Samoa e avea ma laufali faavaomalo aemaise lava i le Lakapi Taitoa 7.
O le finagalo o Tulouna, e pule lava le Taitaifono o le Lakapi i ana lafoga ma ua masani ai foi ae o le faamamafa o loo taulai ai lava le Asosi latou i le unai o ona sui i Samoa auā le faatautaiga o taaloga i totonu lava o le atunuu.
Ona pau lava le laufali ua mafai ona faatautaia taaloga faavaomalo ae ua mālōlō foi i lenei vaitaimi o le susuga Felise Vito o le Malisi. Sa tele foi ina valaaulia atu se isi alii e suafa ia Fetalaiga o Salailua e faatautaia taaloga i Niu Sila ma Ausetalia. E lē o toe i totonu foi o le Asosi i le taimi nei.
