I le lua vaiaso talu ai i le la taaloga na faia i le Waikato Stadium i le taamilosaga mulimuli o le NPC lea na matuā solipala ai e tama o le Mooloo le ‘au mai Canterbury ma manumalo i ‘ai e 20, ae peitai ina ua toe taaalo i le sueina o le siamupini mo le ITM Cup, ua matuā soloia loa i lalo atumauga o le ‘au malosi mai Waikato ina ua manumalo Canterbury 31-13 i le taaloga na faia i le AMI Stadium i le Aso Faraile 5.11.2010. E foliga mai ua matuā liliu e Canterbury le taimi ma fai atu ua lava lea, o le a suia la‘u taalo ma faataatia le alafua (game plan).
O le uluai taaloga lea a Waikato mo le sailiga o le siamupini mai le fa tausaga, ina ua manumalo i le taaloga ma Aukilani i le semi-finals, peitai o le faatolu ai lea ona siamupini sosoo Canterbury i lenei lava taamilosaga, o se taaloga na finauina i le timu ma le malulu i luma o le 10,500 tagata na maimoaina i le malae taalo.
I le mae‘a o le ‘afa muamua na tulai mai le sikoa 13-8, na foliga mai i le ‘au tapuai mai Waikato lea sa auai i le malae taalo, ua iai se lagona faamalosi ma se mautinoa o lea manuia le latou luiina o le siamupini, talu ai la o le latou faatamala ma tele sikoa foai faameaalofa, ae manatua e lē o tuu māmāina foi e Canterbury lea o loo umia le siamupini o lenei lava taamilosaga.
Na faaalia e le alii faiaoga o le ‘au mai Waikato, Chris Gibbes i le media conference mulimuli ane, ua latou naunau tele i le tuliina o ‘ai ua avea ma ala e mamulu soo ai le polo, aemaise ai o Canterbury o se ‘au e faaeteete gata e maua loa le avanoa lē toe maua.
Ua faaalia le fiafia o le faiaoga Canterbury, Rob Penney i le taumafaiga a lana ‘au aemaise o le tight five, lagona foi lona fiafia i le taaloga mulimuli a Stephen Brett o le a tuuvaa atu mo Aukilani, Issac Ross mo le Chiefs, faapena foi ma le alo o le atunuu, Steve Fualau ua filifilia mo le au faavaomalo Manu Samoa i le tour i United Kingdom.
I lenei lava taamilosaga lakapi o le NPC ma lona talafaasolopito i totonu o Niu Sila, ua na o Aukilani ua latou ausia le tulaga o le 4 siamupini sosoo e pei ona iai i le tausaga 1987-1990 & 1993-1996, ua 14 titles ua umia ai le siamupini e Aukilani i le 8 a Canterbury, e aofia ai ma le taaloga faato‘ā mavae atu nei.
O lea la ua manoa ia i le motu i Saute le ITM Cup faatasi ai ma le talita o le Ranfurly Shield mo se isi tausaga.
E avea foi lenei avanoa e faamalo atu ai i le tamafanau a lenei aai o Kalaiesetete, Steve Fualau mo lana miti sa tulimatai e fia taalo mo si ona atunuu.
Sa tulituli pea e le auaunaga a le Samoa Times aemaise le leitio Siufofoga o le Penina o Samoa i faatalanoaga i taimi o taaloga ma ia faaalia lona fiafia, aemaise lana faafetai i le Atua mo le malosi ma le agavaa ua foai.
Sa ia faafetaia foi le tapuaiga a le susuga i le alii faifeau EFKS Shirley, Rev Patini Waterhouse, ma lana aulotu e pele ia te ia, lona aiga aemaise le mamalu o le atunuu i Kalaiesetete.
