O se vaaiga faafiafia loto i ni fanau, ae lagolagoina e matua ma aiga, se latou taumafaiga, e pei o le faauuga, a le aoga maualuga a Chiefly College, Mt Druitt Campus, lea na faataunuuina i le Aso Tofi i le sefulu i le taeao.
Na molimauina le laufofoga fiafia o mātua ma aiga na sagisagi atu e tapuai i o latou alo, e lē gata i teu fugalaau, ae o ula fualaau ia ma le anoanoai o ula lole e pei ona masani ai tagata Samoa ma Toga, e faailoga ai aso faapenei.
O taitai poo kapeteni o le aoga, o le alii Samoa o Sini Sale ma le tamaitai Toga o Rachel Tiseli, ma a laua sui kapeteni papalagi.
O Rachel, na muai faafeiloaia le aofia, ona faasolo mai lea i le saunoaga a le alii pule. Na faamamafaina le tāua, o le tinoū o tamaiti ia latou meaaoga, tāua foi le lagolago malosi o mātua ma aiga, ina ia unai tamaiti i le olaga a’oa’oina.
Aemaise lava, o le sauni atu o tamaiti i suega mulimuli, ia faapea ona faamuamua le faaavanoaina o taimi, e fai ai meaaoga.
Ua alia’e mai le tele o matata eseese e lautogia ma amanaia ai tamafanau Samoa, e lē gata i iuga o suega poo tulaga i mataupu taitasi, ae o taleni eseese o loo taitai ai, ma le tele foi o taaloga o loo faamoemoeina ai.
Na laulogo le nofoaga na faia ai le laugatogi, i siufofoga mālie o tamaitai Samoa o Denzelle Patau ma Malotuupule Tahlia Amituanai Aupa’au.
O le tamaitai lenei o Malotuupule e lē gata i le atamai, ae matuā talenia foi, ona o lona tamā o le auaiga o le faili a le Liona, ma o se tamalii o loo faauluulu i ai le Income Tax Professionals i Penrith, Maposua Tuuu Laulu Amituanai Aupa’au mai Laulii, Siumu, Manono ma le faletua ia Tahlia mai Saina Faleata.
O faailoga nei na faamanuiaina ai taumafaiga a Malotuupule, 1st: English, Music, 3rd Hospitality, Personal Best Home Economics, ma le Golden Award i le faamaoni, poo le aunoa ma se aso e tia’i aoga ai.
Na fesiligia Malotuupule, poo le ā sona faamoemoe pe a mae’a suega o le Yr 12. O lana moemitiga ua leva ona tepa taulai i ai, ia avea ma malu o le malo, poo le leoleo.
O loo sauni atu nei o ia i le vaiaso fou, i se polokalame ua faaigoaina “Taitai mo a Taeao,” lea e tolu sui o le Pasefika, ua filifilia ai.
Na faaiuina le laugatogi i se koneseti na tuufaatasia e le vasega faaiu, lea foi na matuā mataina ai taleni eseese a alo ma fanau Samoa.
E lē gata i pesepesega, o pese taitoatasi, o siva palagi, ia ae na faaiu foi i siva Polenisia.
E iai mātua ma aiga Samoa, e lei mau faailoga o latou alo, ae lei solomuli i le titifaitama ma le pele o fanau, i le gasolo i luga, e faafeiloai atu ona ua iu lelei a latou aoga.
E tāua tele le lelei o le siosiomaga, ona e amata au galuega alofa i lou lava lotoifale.
O mātua o faiaoga muamua ia. Faamalo ma faafetai i nei alo o Samoa ua faauuina mai Chifley College, faafetai saili malo, ia manūteleina a outou moemitiga mo le lumanai, ae tautuana e faamuamua le Atua, ma ia alofa foi ma usitai i mātua.
