“O le sainia o lenei feagaiga, o se matati’a ua ausia mo le toe fausia o le aai”, Pulenuu o Bob Parker
Ua mae’a nei ona tutu’imau le pine faavae pei ona sainia ai le feagaiga faakonekarate mo le tuuina aloaia mai o le tupe aofai e $2 piliona mai le malo ma kamupani Inisiua, mo le toe faaleleia ma le fausiaina o le lotoifale & siomaga (infrastructure) o Kalaiesetete mai mafatiaga o le mafui’e amata mai 4 Setema 2010.
O lenei maliliega auautasi faatulafonoina ua faaigoaina o le Alliance Partnership, e aofia ai le City Council, NZTA, (NZ Transport Authority), CERA (Christchurch Earthquake Authority) faatasi ai ma konekarate tetele e lima, Fulton Hogan, Fletcher, City Care, Downers ma McConnel Dowell.
O le aoauli o le Aso Tofi, 22 Setema, lea ua fitu i ai masina talu ona lulu le mafuie 6.3mg i le aso 22 Fepuari na sainia ai pepa faamaonia i luga o le auala laupapa tele o Fitzgerald Ave lea ua matuā malepe, ma na sainia le feagaiga e le Minisita EQC, Hon Brownlee, Pulenuu Bob Parker, faapea taitai (CEO) o konekarate filifilia e lima. O le faamatuu mai o lenei tupe o le a faaaogāina mo le faaleleia o auala, auala laupapa, eletise & kasa, suavai taumafa, vai eleelea mo fale lē ta’ua (sewage), o le alafua ua mae’a faataatia e tusa ma le lima tausaga fuafuaina mo lea galuega, o le aofai o tagata faigaluega manaomia mo le project e 2000.
O kamupani lava nei sa galulue mai le amataga o Setema mo le tau fonofonoina o auala malepelepe aemaise o eleele magoto, ma o se tasi o aiaiga o le feagaiga e faapea, a faaletonu lava le konekarate o le a faamālōlō ma toe totogi mai sala tupe e pei ona faatatauina.
Faaalia e le alii pulenuu o le aai, Bob Parker lona agaga fiafia tele ona ua laalaa atu Kalaiesetete i le isi sitepu tele lea sa naunautai i ai, o le aumai loa o le tupe ma amatalia le galuega ua leva ona fia faaleleia o le aai aemaise le lotoifale ma siosiomaga o aiga.
Na ia faailoa mai o le tele o isi galuega na taumafai le pulega e faaleleia muamua ona e “urgent”, peitai sa toatele tagata na lē fia taliaina lea fuaitau faapea, ae talosia o le a lē toe iai se tomumu ma ia talosagaina le galulue faatasi e toe fausiaina le aai o fugalaau matala.
