E faitau selau le mamalu ole atunuu sa tumutumu i totonu ole Shopping Centre o Magele ile taeao ole Aso Toonai e molimauina le auai atu ole siamupini ole lalolagi ile fusi ole WBO le afioga ia Laauli Lupesoliai Joseph Parker ise valaaulia faapitoa ale itumalo o Magele e asia ai laufanua o Magele faatasi ai ma le fusi ole WBO lea oloo ia umia ile taimi nei.
Ma ose faaaloalo maualuga foi lea ale afioga ile faipule ia Aupito Su‘a William Sio ma lona itumalo faapea nisi ole Local Boards a Magele faaatasi ai ma le afioga ile aloalii ia Galumalemana Tai Galumalemana ma lana tautua ole G-Mana Wholesale Autos Ltd i lea tamafanau ole atunuu ona ose tulaga maualuga o taaloga o faipelega lea ua ia ausia, ise taimi muamua lenei.
O lea faamoemoe na vaaia ai le tele o tupulaga talavou laiti ua lolofi atu ile fia pai ia Laauli Lupesoliai Joseph Parker ma lana fusi, ae ose avanoa lelei foi lea na pipii ai ma le lu‘i a Laauli i tupulaga talavou uma sa auai e ala lea i lana saunoaga matagoife.
Ole faafetai a Lupesoliai Laauli Joseph Parker na ia faafetai ai ile mamalu o matua, aiga ma uo ile tapuaiga ma le nofo tatalo ao iai i lana taaloga, ma ua ia lagona foi lona fiafia ile avanoa ua saunia ele faipule ma lona itumalo e mafuta ai ma ona tagata nuu o Samoa faapea foi nisi o lona aiga, ae le gata i lea o lana faamalosi i talavou, e faapea, afai o iai se sini autu oloo e faataatiaina mo sou lumanai manuia, ia e talitonu lava oe ia te oe ete mafaia, e ala lea i lou galue malosi aua le faalogologo tiga ae ia finau i taimi uma ma aso uma faatasi ai ma le fesoasoanai ale Atua, ona mafai lea ona e ausia le sini oloo e faamoemoe iai.
Na saunoa foi Lupesoliai Laauli, ile taimi o ana tapenga ile fusi ole lalolagi sa ia galue malosi, sa tele foi faigata sa iai ae sa finau lava, sa iai foi taimi e tagi ai, ae sa faamalosi lava, lea ua tali mai lona tautiga e pei ona ia umia ai le fusi ole WBO.
Ole faafetai ale faletua ia Sala Parker na ia faafetai ai ile lagolagosua a aiga ma le atunuu faatasi ai ma le nofo tatalo lea ua mafai ai ona maua le siamupini mo Samoa, ua agiagia ai foi ma le fu‘a o Samoa ile lalolagi ona o taumafaiga a fanau.
Na ia momoli foi le agaga faafetai ile afioga ia Aupito Su‘a William Sio ma lona itumalo faapea le afioga ia Galumalemana ma lana faletaavale faatasi ai ma le susuga ia Singh ile tuufaatasia o lenei polokalame mo Magele.
Ao le saunoaga ale afioga ile faipule ia Aupito Su‘a William Sio na ia faaleo ai le agaga faafetai i matua o Laauli Lupesoliai faapea lona uso ia John Parker ile siamupini ai o Parker ile fusi ole lalolagi, ua mafai ai ona tusia le igoa o Samoa i luga ole faafanua ole lalolagi ile tala faasolopito o siamupini o fusuaga, ua le gata ia Samoa ae ua tuu ai foi le igoa o Niu Sila, o Magele ma le Pasefika atoa.
Saunoa foi Aupito, o Magele ole faitotoa lea mo tagata e siamupini ole lalolagi poo tama fanau ua ausia le tulaga maualuga o taaloga e pei o Toaletai David Tua, SOL3 MIO, Jonah Lomu ma John Kirwan.
Ile faamoemoe maualauga ole faipule i lenei polokalame ia mafai ona valaaulia ai Samoa ma tagata uma e potopoto atu e faailoa le agaga faafetai i lea alo ole atunuu ona ose tulaga maualuga ua ia siitia ai le igoa o Samoa, ua maea le faaaloalo a Samoa e pei ona faatinoina i Samoa, ao lea ua alo atu Magele e faatino se faaaloalo faapenei mo lea foi tama fanau.
Ole aso foi lea sa tauaaoina atu ai ele faipule se ki e faailoa ai se faaaloalo e momoli atu ai le agaga fiafia ma le agaga maualuga ile alii o Laauli i lana taumafaiga ua tauleleia ai le atunuu o Samoa ma Niu Sila, ma ua faaupuina lenei ki, e tatala uma ai faitotoa o Magele mo ia i soo se taimi.
Sa faapea foi ona momoli le saunoaga faamalo ale afioga ile Konesula o Samoa ia Faolotoi Reupena Pogi ilenei faamoemoe taua lea ua tapenaina mo tama fanau ole atunuu e iloa ai le aloaia o i latou oloo tauaveina le tagavai ale atunuu i taaloga.
Ua vaaia lagona fiafia i tagata i lea aso, ua le gata ia Samoa ao isi foi tagata mai isi atunuu ua laulaututu ma maimoaina le tele o faafiafiaga eseese sa faatinoina aemaise ai o lauga autu ole aso.
Sa faapea foi ona matagofie le upu faalaeiau na saunoa iai le afioga ia Patele Michael Ennderman lea sa tatala aloaia ai le faamoemoe.
Na taualuga le faamoemoe ole aso i pueina o ata ole mamalu ole atunuu faatasi ai ma le susuga ia Laauli Lupesoliai Joseph Parker ma le fusi ole lalolagi.
