O foliga o le fiafia ma le loto faagaeetia i aiga, o mātua faapea uo ma ē masani sa auai i le hall a le Town Centre i Papatoetoe ina ua alalaga ma viivii i le Atua e osi le taulaga faafetai ma le faamanū i lē ona le malosi ma le mana ina ua aulia mai e le tamaitai o Renee Lafaialii le faamanauina o lona 21 tausaga.
Ua soo faatasi lagona o le olioli ina ua molimau le susuga le faafeagaiga ia Fatu Manu i le upu faamalosi mo le tamaitai faatasi ai ma le molimau a lona tuaa ia Lafaialii Tunufai i lona soifuaga, o se tamaitai e filemu toe usiusitai i ona mātua aemaise ai o lona fiafia e faaaogā lona ola mo le Atua ma lana galuega. O Renee o le ulumatua lea o le aiga, a o lona tausaga tolu lenei i le aoga faafomai i le Univesite i Aukilani.
O alofaaga ma faamanuiaga mai i lana Ekalesia Kerisiano Soofaatasi a le Atua i Papatoetoe, le susuga le faafeagaiga ia Fatu Manu ma le faletua ia Kuini, o ona aiga mai Samoa, Ausetalia ma Niu Sila nei ae sili ai faamanuiaga mai ona mātua ia Lafaialii Tunufai ma Foloi Lafaialii faapea ona uso.
