O le aso o le lipine pa‘epa‘e o se aso ua faamamalu ma unai e le Matagaluega o Samoa. O se lanu ua faia e leoleo e laei ai le toatele ma taumafai ai e manatua le unai a lea foi ofisa mo le saogalemu o tamaitai ma fanau i totonu o aiga.
O se lagolago lea a le Matagaluega i Aso e 16 ia ua faagasolo e taofi ai sauaga ua vaaia le faatuputupulaia pea i totonu o Samoa. O le Matagaluega o Leoleo e iai lana lava vaega o lana auaunaga ua patino i sauaga i totonu o aiga.
Ua silia i le lima tausaga talu ona faatuina lea vaega o le tautua a Leoleo ona o taimi ua tuanai sa tuufaatasi lava ma isi soligatulafono o loo feagai ma Leoleo i aso taitasi.
Talu ona faavae mai lenei vaega o le tautua ua matauina e leoleo le toatele ua agai atu i le ofisa mo sauaga lava ia ua fesootai ma tina ma fanau aemaise le tulai mai i totonu o Aiga.
Ua faagasolo faalauiloa a le Matagaluega e pei o se ata o loo taitaia ai e le Komesina o Leoleo le talosagaina o le atunuu e taofi nei sauaga.
O le tausaga lava lenei e silia i le 400 tagi ua oo atu i lenei vaega o sauaga i totonu o aiga ma ua iai foi tamaitai ua maliliu i lenei tausaga ona o nei lava sauaga. O le mafuaaga lea o le unai a le Matagaluega ina ia iai lava se latou faalauiloa i lenei faafitauli e ese mai i taumafaiga a isi ofisa a Samoa ma ofisa faavaomalo o loo faasolo i lenei vaitaimi mo lenei lava faafitauli.
E lē o iloa lelei e leoleo pe ua tele lipoti o lenei tausaga ona ua pau lava ua siisii le solitulafono o sauaga faasaga i tina ma fanau pe ona o le tele o le faalauiloa ua mafua ai ona toatele ua agai ane i le ofisa o leoleo ina ia lipotia nei sauaga.
O se solo tele na faatautaia lava e Leoleo i le taulaga o Apia na manatua ai lenei aso tāua ae o le faamamafa na ave i faamatalaga a Leoleo o le tulaga lea e toatele lava tina e agai atu e toe foi lava i le talosaga o le faaui i tua o nei tagi e faia faasaga i o latou taitoalua poo uo tama foi e faia nei sauaga ia i latou.
O le fautuaga la lea na faia e leoleo i le talosagaina o le atunuu afai ua oo atu le tagi i leoleo tuu atu le galuega e faamae‘a ma ia oo i le faamasinoga ona e molia atu nei ae pe toe oo atu taeao ua agai atu lava tamaitai ma talosaga e toe aveese ma faaauau ai lava sauaga e tulai mai.
O lea ua iai foi polokalame e faalauiloa i luga o leitio i vaiaso taitasi aemaise polokalame ua faia i aoga ina ia faamautu ai le lototele o tamaitai e lipotia nei sauaga ua faia.
O le autu o le feau a Leoleo ua unai nei, aua ne‘i toe gūgū se tina a o se tamaitai foi pe a tulai mai nei sauaga ona e tatau ona taofia ma faaitiitia ai foi le tulai mai o faalavelave e pei ona maliliu ai lava nisi o tamaitai i lenei tausaga.
