E leai se isi tala ua sili ona saoasaoa lona tala‘iga i totonu o le afioaga o Laulii, ua na o le faafetai ma saga faafetai ua mae‘a le galuega ua leva tausaga o moemiti i ai.
Na amata mai ona fuafua le fausia o se maota tele poo se hall e lei ta‘uta‘ua le tulai mai o le susuga Vainiu Te‘o i le suafa Leniu, ae o lea ua oo mai i lona taimi faatoa tino mai.
Na alu muamua le suegatupe i Niu Sila a se komiti sa muamua faia le fuafuaga mo se pa e siomia ai le faleaoga tulagalua a le nuu, peitai na foi i Samoa ma le luaselau afe ma ona tupu ae sa lē taunuu le faamoemoe.
E lei toe ta‘uta‘ua ai lava ma le faia o se galuega, peitai ina ua toe a‘e se finagalo o le afioga Leniu ma le nuu e tatau ona toe faaauau le miti mo le sioina o le pa ma fau se hall, na amata loa ona faatino sailiga seleni.
Na maua le fesoasoani mai le Malo Amerika e $150 afe tala, peitai o le taimi na amata fuafua ai le hall ma le faaupuga o se nofoaga e faaaogā e le nuu i taimi o faalavelave faalenatura, ua iai se isi vala ua aafia ai.
Na faamatala se tasi o le nuu e oo atu se alii Initia o se inisinia na faafaigaluega e le Malo Amerika e silasila i le tulaga lelei o le galuega, ua taoto le faavae o le fale ua amata fausia e le nuu.
“O le gaioiga lena na solomuli ai Amerika ma lana fesoasoani ona ua lē pasia le faavae o le galuega ona ua fai si tele naua ai o le fale ae lē fetaui ma le seleni.”
O le vaega tonu lea na amata ai loa ona saili tupe le nuu i fafo i Ausetalia ma totonu o Samoa e ala i se leitiofoni ma saogatupe a aiga ma amata ai loa le galuega.
Na saunoa Leniu e 300 afe ma ona tupu le seleni atoa na maua, ae na alolofa atu isi tagata faapea foi ana seleni na tuuina atu lea e maua ai se aofaiga atoa o le tau o le hall e silia i le lima selau afe.
I le tala o le galuega na saunoa iai le tofa Tuautu Saumalu, na ia faailoa ai e lei faigofie ona sa iai foi se vaega o le nuu sa faamiimiie ma iai lagona o le musuā ona e oo loa i mea nei o saogatupe e iai lava isi e vaivai le tala o le seleni.
Peitai e lei faavaivai ai le Sa‘o Faapito ma le komiti. O le umusaga o le hall na auai nisi o Minisita o le Kapeneta ma le sui Palemia faapea le mamalu o valaaulia o uo ma aumea mamae a le nuu. Na auai foi sui o le mafutaga a Laulii i Niu Sila na latou foai le $20 afe, faapea le mafutaga a Laulii i Ausetalia na foai le isi $20 afe.
E $15 afe na maua i meaalofa tupe a malo valaaulia ona tuufaatasi lea ma maua ai le $55 afe tala i le aso o le umusaga. Na vavae ese le seleni mo le kamuta ae totoe le isi seleni na tufatufa uma i le nuu.
E leai se aitalafu o le galuega, o le mafuaaga o le fiafia ma le faagaeetia o le afioga Leniu ma ona alo faapea le afio o Fuamatu aemaise Tuisamau ona ua iu manuia le galuega.
O le vaega tāua o le faamoemoe atoa e pei ona saunoa Leniu Vainiu i le tusitala, ua tu le hall ae ua fausia foi ma le pa uaea lelei ua siomia uma ai le lotoā a le aoga tulagalua ua tutu ai nei ma le hall o le a faaaogā e le aoga tulagalua, ae tatala foi mo le nuu ma le lautele o le atunuu.
O faaipoipoga ma asofanau faapea nisi sauniga e pei o taaloga Bingo o le a faaaogā i ai le galuega ua mae‘a.
