Ua ea le pologa o mafaufauga a o tulimatai le vaai a le susuga ia Kenape i se taimi e tuufaatasia ai ma le tamaitai ua nanau i ai lona loto, le agaga ma le mafaufau, le tamaitai o Roseane Tauti Alefaio.
Na tuufaatasia i le faaipoipoga i laua i le Aso Toonai na tea nei. O le faatoa faiava e alaala i Niu Sila ae mai le alalafaga o (Pata Falelatai) ae o loo galulue ona tuaa o faifeau i le afioaga o Saanapu Tai. Ua maliu si ona tina ia Matagitau ae o loo soifua pea si ona tamā o loo galulue ma si ona faletua (stepmom) i le Ekalesia EFKS a Saanapu Tai (Rev Iakina & Rowina Obrien Alefaio).
O tuaa o le tamaitai faaipoipo o le susuga i le faafeagaiga Ekalesia AOG Carole Park, o Ps Sini ma le faletua ia Sauao Tauti (Fuailoloo Mulifanua & Samatau). O le grandmother o le tamaitai faaipoipo sa foaia o ia, le tina matua ia Tipesa Mati Tala‘i.
Sa taitaia le sauniga lotu e le taitai o le Ekalesia AOG Church of Samoa a Inala, taitai foi lea o le Ekalesia aoao AOG Church of Samoa a Ausetalia, Susuga Ps Taea‘auga Ropati Frost.
O le susuga ia Seuseu Tenari sa fai ma fofoga o le aso, ae o faaaloaloga sa faatautaia e le susuga ia Tomane Tafatolu mai Amerika, o le itu a le tamaitai faaipoipo.
Sa fai ma sui o le auvalaaulia le tamā matua mai Samoa ia Leuluaiotofiga Puletini Faafeu e momolia se agaga faafetai i le paia i aiga na lua i le matagofie o le aso. Sa mamalu le aso i le auai o le paia o le aiga faafeagaiga AOG Church of Samoa ma faletua faapea ekalesia, faapea le susuga i le faafeagaiga ia Sataraka Sanerivi ma le faletua mai Niu Sila aemaise uo ma aiga.
Ia manuia le aiga fou ma ia faavae i le alofa. Alofaaga e auina i o oulua mātua ma tauaiga, uo ma ē masani faapea ekalesia.
