O Samoa lava na uluai faavae ai le tauvaga na sailia ai se Tausala o le Pasefika i Saute poo le Miss South Pacific Pageant. Ua savali nei le luasefulufitu tausaga o faagasolo pea lenei tauvaga, ma ua lauiloa ai atunuu eseese ona oo latou sui tauva tamaitai ua faapaleina ma manumalo i le pale.
O le auga autu o le tauvaga ia siitia ai le atinae o tagata tafafao poo tulisi, ma o le mafuaaga foi lea o le amatamea ai o Samoa. Ua tuanai na tausaga ma ua oo mai i lenei vaitau o le talutalu fou o le meleniuma fou ua tatou iai nei, ua iai foi suiga ua tulai mai.
O le suiga ia faaigoa le tauvaga i se igoa e aofia uma ai i totonu atunuu uma ma motu eseese o le Pasefika le Miss Pacific Islands Pageant ua faaigoa ai nei. O Samoa foi lea ua toe amatamea i le suiga fou ona na faaalia e se tasi o le komiti o tapenaga, o le mafuaaga lea o le amatalia atu i Samoa o lea suiga ona o le atunuu na faavae atu ai le tauvaga.
O isi motu ma atunuu e lei totonu o atunuu e tutū i le itu i Saute o le Pasefika sa lagomia finagalo i le auai pea ae e lē o fetaui le igoa sa faaigoa ai o le tauvaga o le sailia o se Tausala o le Pasefika i Saute, le mafuaaga na tuuina atu ai se manao o ia motu i le komiti tele o le tauvaga ma faatalatalanoa ai.
Ua maua ai ma le faaiuga e suia e pei ona amata ai i Samoa i le tauvaga o le a faia i le po o le Aso Faraile nei i se tasi o faletaalo i le malae o taaloga o le Faleata sports complex i Tuanaimato. O le Aso Sa na tea nei na lolotu ai tamaitai tauva e toavalu i le sauniga taeao a le ekalesia Katoliko i le Malumalu i Mulivai i Apia, ae o le afiafi o le Aaso Sa na faatasi atu ai ile sauniga ua suia ai nei le igoa o le tauvaga. O le televise o le TV1 i Mulinuu ua manumalo lana ofo nate faasalalau i atunuu o le pasefika le tauvaga ile po o le aso Faraile nei. O loo faatali le komiti pe talia e le Bluesky lo latou faasalalau fua o le tauvaga i fesootaiga televavave poo le online coverage.
Faaalia e le susuga Su’a Hesed Ieremia o le ofisa sinia o fesootaiga ma faamatalaga ile pulega o tagata tafafao, e lima faletelevise i Samoa na tuuina atu ofo, ae manumalo ai le TV1 i Mulinuu.
O le tulaga mautinoa pe a fua i le faamatalaga mai sui sooupu o le pulega o tagata tafafao i Samoa, e tatau ona maua uma e atunuu o le Pasefika faasalalauga mai le faletelevise o le TV1. O le lua vaiaso ua mavae na faalauiloa ai e le tamaitai pule o lea faletelevise le afioga Galumalemana Faiesea Lei Sam Matafeo, le mae‘a faatuina o se tasi o ana satellite e mafai ona faasalalau ai i fafo le tautua a le latou TV1.
