O le faia‘ina a le Samoa A ia ACT XV i le 59-19 i le Aso Faraile, na amata ai le iloa o nisi o faafitauli o loo feagai ma le alii faiaoga ia Muliagatele Brian Lima. Muamua, na taunuu le aufili a le atunuu i le Aso Tofi ae taalo i le Aso Faraile ma le au malosi lenei a le ACT XV.
“Ailoga o faia faapenei au a Toga ma Fiti lea foi e taaalo i le tauvaga lava lenei,” saunoaga lea a Lima. Ua silafia e Samoa ma le lalolagi le tautua vela a lenei Toa i taimi o taalo.
Na vaaia le malulu o le tau i le Vikings Park, Wainiassa i Canberra pe tusa ma le 9 tikeri le maualalo ae na masii atu lava le tapuaiga a le atunuu. Na muamua sikoa le pou a Samoa ia Jake Grey ae peitai na malosi le osofai a ACT ma manumalo ai 59-19.
O le au lenei a le ACT e 16 sui o le Brumbies na iai auā sa Bye le au tele. “O le tulaga e lelei ai ua fetaui tama fou o le tatou au ma le ituaiga maualuga lea e taaalo ai le supa sefululima ma e aogā mo le lumanai,” o se manatu lea o Muliagatele Brian.
O se taaloga faigata auā faatoa taunuu mai le au i le Aso Tofi ae fetaui ma ACT i le itula e ono o le Aso Faraile. Na mataina le taalo a le numera valu, le alii Samoa o Fotu Auelua i le ACT.
O le isi tama Samoa iloga lana momo’e o le pou a ACT Brumbies ia Sott Sio mai Vaiala ma Solosolo. O Scott Sio o le alo o Tina ma Nuafesili Tavita Sio lea na pou i le Manu Samoa i le 1991.
Na faaalia e le alii kapeteni a ACT ia Robbie Coleman lea foi na sikoa faalua i lea taaloga, “Na vaaia le malosi o le Samoa A e pei lava o isi au Supa 15.”
O se tulaga faanoanoa i lenei taaloga amata o le malaga taamilo i Ausetalia nei ma Niu Sila o le manunu‘a o nisi o tama ae pagā lea e leai se fomai o le fofo poo le Physiotherapist.
“O se popolega lenei ia te au ma le au atoa auā a toatele nisi e toe lavevea mai ua faaletonu le taamilosaga,” Lima. E lei faailoa mai e Lima pe na malilie le Samoa A e malaga mai e aunoa ma se fofo (physio) pe mata na faia ni fesootaiga a le Iuni Lakapi a Samoa ma le Iuni a Ausetalia mo se fesoasoani.
“O le matou numera 10 ia Faialaga Afamasaga na lavea muamua sui atu ai Uale Mai, sosoo ai ma le manu‘a o le alii kapeteni ia Maselino Paulino.” E toafā ni tama e faaopoopo i le au mai Ausetalia nei ma Niu Sila ae talosia ia maua ai ma se taulasea o le au.
Sa fesiligia e le Samoa Times ia Muliagatele Brian Lima i vaitau na malaga mai ai i Canberra i le taitoafitu Siamupini o le 1993-1995. “O le vaitau ia na o le tasi lava le taamilosaga taitoafitu faalevaomalo na o Hong Kong talu mai le 1976, ae peitai na amata loa le fitu i Canberra maua ai ma avanoa o aufili a atunuu e faavevela ai faatoa malaga ai i Hong Kong.”
Na siamupini Samoa i Canberra ae oo i le vaiaso na sosoo ai toe suipi i Hong Kong mo le taimi muamua faatoa luasefululua tausaga o Lima.
“O se tausaga aupito maoae lea e pei ua manumalo i le Ipu o le lalolagi Samoa ma e lē faagaloina.”
O le tausaga lea na avea ai foi le tina ia Marina Schaffhausen ma taitaimalaga tamaitai muamua i soo se aulakapi o le lalolagi.
O Lilomaiava Taufusi Salesa le faiaoga ma le kapeteni o Danny Kaleopa, Lolani Koko, Andy Aiolupo, Filipo Saena, Sila Vaifale, Alefaio Vaisuai, Alama Ieremia, Veli Patu, Junior Tonuu & Junior Parramore.
O le naunautaiga o lenei alo iloga o Samoa ia faapea foi le Samoa A ia amata atu i Canberra luitau o le lakapi ma ia oo atu i ni tulaga maualuluga mo le Manu Samoa
i le lumanai.
