E toe faatalofa atu i lenei foi vaiaso ma ona galuega tau amata, ae faamalo atu pea mo galuega o lenei foi vaiaso ua tuanai atu. O loo maualuga pea le alofa ma le agalelei o le Atua, ma lana faasoasoa mai i lo outou soifua manuia, ma so matou foi malosi, ua mafai ai ona faaauau pea feau ma tiute masani. Faafetai tatalo, ma faafetai tele i le tapuaiga. Ia viia pea le Atua i galuega ma tiutefai, mai lea taimi i lea taimi.
Ua faagasolo pea la tatou tusitusiga ma le tatou itulau masani. A o lei see atu mo le tatou malo faaaloalogia o lenei vaiaso, ae toe faafetai atu pea ia i latou ua mae‘a ona fesoasoani mai mo le galuega. O le mea moni ua tele ni luitau ma ni feau aogā, ae sili ai ona matou faafetaia atili a outou galuega tāua sa tautua ai, aiga, nuu ma ekalesia, faapea le igoa pele o Samoa.
O le malo faaaloalogia ua faatasi mai ma fesoasoani mai mo vaiaso ua faatulagaina mo ia. O se tasi o tina, sa fai si umi o tautua mo le atunuu i galuega i totonu o le malo o Samoa.
O le tele o lona soifua galue, sa faaaluina i ofisa o le malo, faatasi ai ma ofisa o alii Minisita sa tulai mai i lena vaitaimi.
O le tāua o le galue ai o lenei tina i ia ituaiga galuega, ona sa maua ai fesootaiga vavalalata ma afioga i Palemia sa tauaveina le atunuu mai vaitau ua mavae.
E lē gata i lea, o alii Minisita e pei lava ona faailoa atu. E tele foi sona silafia i fafo ma le lotoifale sa faatamoe ai le malo o Samoa ma ana polokiki i le vaiatimi o toeaiina matutua sa iai i lo latou vaitaimi.
E laititi lava se taimi sa galue ai mo se kamupani i totonu lava o le atunuu, peitai e pei ona ta‘ua o le tele o lona taimi ma lona soifua galue, o totonu lava o le malo ma ona upufai.
E tele ni tala matagofie, e anoanoai foi faamatalaga lē manuia o mea sa tutupu i lena vaitaimi i le faagaioia o le Malo Tutoatasi o Samoa.
Peitai e ui i lea, sa faaaogā tala lē manuia, e avea o se ata mālie, ae sa taulai pea le talanoaga i le loloto ma le tamaoaiga o finagalo, ma le tofa faatupu ma le faatamalii sa fausia ma soalaupuleina ai le va fealoaloai o polokiki a tamā ma toeaiina sa tutū i le foe mo le Sa o Samoa, la lea ua a‘e ai ma le malo faiva o alii tautai ma taitai i lenei vaitau.
O se tasi o tala sa faigata ona faagalo e pei ona faamatalaina. O le taimi na tutuli ai e le Palemia o Samoa sa tulai i lena vaitaimi, le Afioga Mataafa Fiame Faumuina Mulinuu II, le ofisa ma le aufaigaluega a Malo Aufaatasi (United Nations).
A o iai le latou ofisa i totonu o le atunuu, peitai sa iai se tulaga sa lē fiafia ai le alii Palemia, ma tutuli ese ai loa ma le atunuu.
E mālie ae o se ata e toe faamanatu mai ai le maopoopo ma le tasi o le tofa sa fau ai le malo ma ona upufai, aemaise ai e lē tele ni tala, ma tau faaumiumi le faia o se faaiuga, ae na ona sasi lava, fafo loa ma le maafala.
E lei mae‘a ai i Samoa le soifua galue o le afioga ia Pepe, peitai sa toe malaga i Niu Sila ma le aiga, ma toe faaauau ai pea galuega ma galue ai. Sa oo lava foi i totonu o le Matagaluega o Tagata Atumotu o le Pasefika i lona uluai taimi sa faavae ai.
O le a e silasila ma faitau uma i ai i ia vaega o lona soifua, i le taimi e auiliili atu ai galuega sa galue ai.
Pepe Frances Isabella Moore
Aso soifua: 16 Novema 1938
Afioaga: Fanau ma Soifua a‘e i Vaimoso
Tuaa: Tama – Alfonso Philipp
Tina – Isabella Fruean
O le afioga ia Pepe sa soifua a‘e lava i le afioaga o Vaimoso i Apia, i ona mātua o Alfonso Philipp ma Isabella Fruean. O le toeaina ia Alfonso sa soifua a‘e mai i se alii Siamani, ma lona tina o le aiga o Schmidt i Safotu i Savaii.
O lona tina o Isabella e tupuga mai i le aiga o Fruean i Vaimoso, Apia ma Toamua. O afioaga la o le afioga ia Pepe, e tele peitai e tau lalata mai Vaimoso, Apia, Safotu, ma Toamua.
O le tamā o Pepe, e pei ona silasila i ai, o Alfonso Philipp, o ia foi sa tautua ma galue i le malo i le tele o galuega.
Sa faauluulu i ai le ofisa o Faiga Faiva ma le maketi o i‘a a le atunuu. Mulimuli ane sa ulufale i le Palemene o Samoa, ma tofia ai e fai ma Minisita o le Matagaluega o Faiga Faiva, ma le maketi o i‘a.
O le tausaga e 1959, na faaipoipo i le afioga ia Figota Alai‘asa William Moore o Vaivase. O se alii papalagi Samoa ma Aialani. O William sa auina atu i Samoa e vaaia ma faauluulu i ai galuega tau le eletise a le atunuu.
E tele foi sona sao i le faagasologa o galuega mo le eletise, faapea ai ma le faia o ni a‘oa‘oga faapitoa mo agavaa i lea lava ituaiga galuega, sa faamanuiaina ai nisi o tamafanau a Samoa.
E toaono o la alo; e toalima tama, ae toatasi le tamaitai. O le susuga ia Fotumaimalo Patrick Moore e matua, o loo faigaluega i le kamupani vaalele a le Emirattes i le atunuu o Arapi.
O se alii pailate mo vaalele a le kamupani e pei ona ta‘ua ma loo aumau ai foi i lea atunuu mo le taimi nei.
O John Moore, o se alii faipisinisi ma o loo avea ma onaina se kamupani faufautua mo masini komepiuta i Niu Sila. O William Jr, o loo nofo pea i Samoa, ma o loo faagaioi ai foi sana pisinisi, ma o se faufautua mo mataupu eseese. O le alii o Philipp Moore, o loo pulea se tasi o kamupani a le aiga, mo le aumaia o taavale mai fafo i totonu lava foi o Niu Sila.
O le tamaitai e toatasi o le aiga, o Erinmarie Moore – Kellett, ua faaipoipo atu o ia i le alii sa avea ma numera sefulu, pe na ofuina le ofu o le aulakapi a le atunuu, le Manu Samoa, le alii o Darren Kellett.
O le alii laititi o Cleland Moore, o loo aumau ma nofo i Ausetalia, ma o ia o se alii faufale (builder).
O le tausaga e 2009, na tatala ai e le maliu le mafutaga a le tina, poo le afioga ia Pepe Frances Isabella Moore ma lona alii, le Afioga Figota Alaiasa William Moore. O le taimi nei, o loo alaala ma papaao Pepe ma si ona alo tamaitai i Aukilani i Niu Sila.
Soifua a‘oa‘oina/Aoga
O le tausaga 1946 – 1953, sa uluai ulufale ai i le aoga tulagalua a tamaitai a St Marys Primary i Savalalo i Apia. O le 1953 sa faamanuiaina ai i le faailoga tāua o lea tausaga – 1953 DUX MEDALIST.
O le 1954 – 1955, sa agai ane ai pea lava i isi vaega maualuluga o a‘oa‘oga i totonu lava o St Marys, St Marys Commercial, Apia Western Samoa. O le taunuuga o lona soifua taumafai sa ia ausia ai ma mauaina se sikolasipi – 1955 APIA SCHOLAR.
O le tausaga e 1959, na malaga ai i Ueligitone i Niu Sila, ma faaauauina ai a‘oa‘oga i Matata Eseese.
E tasi le tausaga sa faataunuuina ai lea a‘oa‘oga i Ueligitone (Wellington Technical Institute). Sa toe malaga i Aukilani i le tausaga e 1985 ma toe a‘oa‘oina ai foi i le tomai o le tāina ma le tusitusia o matata eseese i masini komepiuta (Auckland Typing and Wordprocessing School NZ).
O le 1990, sa toe faaauauina ai nisi o a‘oa‘oga i Ueligitone lava. O ni a‘oa‘oga sa faaaogāina ai auala faaneionapo e pei o le faatinoina i maota ma fale (International Correspondence School, Wellington NZ).
O le vaiaso fou o le a e silasila ai ma faitauina i nisi o faailoga ma matati‘a sa ia ausia i le tulaga o a‘oa‘oga, atoa ai ma se vaega o lona soifua galue.
E tele nisi vaega tau i faamatalaga o le galuega ma le tulaga sa auauna ai le tina, le afioga ia Pepe, o le a mafai ona taumafai e tusitusia i vaega o mulimuli mai. Toe feiloai i le vaiaso fou. Faaauau pea ma ia manūteleina lenei vaiaso ma ona galuega masani.
