E lē o taofia le aiā tatau e fai ai talosaga i le Faamasinoga e faatatau i faiga piopio o le Palota na mae‘a atu nei ma ua vaavaai nei le Itu Agai e faatino lea foi vaega o le aiā tatau o le Palota e faia faatemokarasi.
O le finagalo lea a le Peresitene o le Tautua Samoa, le Afioga Vaaelua Eti Alesana ina ua fesiligia pe o lui e le Tautua le faitauga aloaia o le Faiga Palota a le atunuu.
O le tali a Vaaelua e lē o iai se faaseā o toe laga i le iuga o le Faitauga aloaia o le Palota, e ui o lea lava ua laga e le Komesina o Faiga Palota uiga piopio o nisi o le aupalota na mafua ai lava le umi o le taimi o tau toe faitau ma faamaopoopo le iuga o le Palota.
O isi tagata na maua ua faalua ona palota i sui eseese. E uma ona vali le lima e faailoga ai le faiga o le palota ae toe agai i isi fale palota ua matuā tape ese le vali ae toe palota i le isi sui.
O lea ua fuafua se tagi a le Ofisa o Komesina o Faiga Palota faasaga ia i latou ia.
E ui la e lē o faatino se tetee a le Tautua i le faitauga aloaia lea o le Palota, ae ua sauni a latou talosaga.
“A fua atu lava i ai e mafai ona oo atu i le 11 talosaga e faaulu e le Tautua Samoa faasaga i sui na tauva o le HRPP ona o mau ua aoina faasaga i faatosina fai faasolitulafono e ia sui,” o se faamatalaga lea a le Peresitene.
“O loo faatalatalanoa lava le mataupu i le taimi lenei ae e mautinoa e mafai ona fai talosaga e 11 i le taimi lenei”.
Ua tele fautuaga ma lapataiga ua faatu mai e le itu a le Malo faapea le Sosaiete o Loia i vaiaso ua tea e faatatau ia i latou ua iai le manaoga e faaulu talosaga ona a faaleaogaina uma tofiga e toe faaauau foi isi tagi e ono fai faasaga i sui nei.
O le a faapea foi ona taofi ai loa ma le faatinoga o tiute faafaipule o sui nei ae agai i le Faamasinoga e saili poo ai se isi o le a palasi mai i tofiga o iai nei ma toe foi i le faatinoga o palota laiti ina ia mafai ai ona toe saili nisi sui faipule.
O le isi tulaga na ta‘ua i le laga ai o Talosaga o le Palota, afai ae faamaonia nei tuuaiga o lona uiga o le tagata e molia ma faamaonia le solitulafono e lē mafai ona tamoe i le isi palota auā e lē atoa le lima tausaga e faasala ai ma o le a alu le lisi i suafa o i latou ua faamaonia le fai mea piopio i taimi o faiga palota ma e tatau i sui uma ona mautinoa e lei faia foi ni a latou faatosina auā e ono aafia itu uma e lua i Talosaga nei.
E ui i ia lapataiga, o loo iloilo toto‘a pea e le Tautua Samoa lea tulaga ona o le mau o tagata o le a faia a latou tagi, e lei iai ni uiga faapea na o latou faatino i le aso o le Faiga Palota ma nai aso a o loma ai le sailiga tofi a le atunuu.
O le faatāua lava na ta‘ua e Vaaelua o le fai o le amiotonu, aua le faafefe mai fua i lapataiga ina ia aua ne‘i iai ni Faamasinoga ona taofi lea ae o loo iai le pio e tatau ona faasa‘o ma ia faaauau ai faiga filifiliga faapenei a le atunuu ma le mautinoa e lē tatau ona faia uiga solitulafono e soo se tasi e manatu e tatau ona tulai mai i tofi e taitaia Samoa. O le Aso Lulu o le vaiaso lenei e faagata ai le faaulu atu o ni talosaga e faatatau i le Faiga Palota a Samoa.
E to‘a 13 sui faipule o le Tautua Samoa ia ua ofi atu ma faatu mai le Itu Agai a le Palemene o Samoa, ma e manatu Vaaelua Eti o loo telē lava le avanoa e toe tulai mai ai nisi o latou sui pe afai e faamaonia a latou talosaga faasaga i sui o le HRPP na o latou tauva.
O le tufa lava o tupe ma le faia o taumafa mo le au palota i le vaiaso mulimuli lea a o aga atu Samoa i lana faiga palota aemaise foi le aso lava ia o le Palota lea na ta‘ua e nisi na matuā lē popole lava nisi o sui i le faaaliali ai o le ave o tupe o ‘ava malosi ma ipu meaai i sui Palota.
O le mau a se tasi o sui na tauva, e tatau lava ona faasala ma tagata Palota auā e sili atu le piopio o tagata nei nai i lo sui tauva i le aso o le Palota ona o le manao e saili seleni ma saili taumafa mai i sui tauva.
O tala o le tufa solo o teutusi i le po a o loma ai le palota ma le la‘u o aupalota a le isi sui e le isi, ua faamomoe nisi i faletalimalo a nisi o le au faipisinisi ae ave sa‘o loa i le fale palota i le aso tonu o le faiga filifiliga, o nisi ia o tuuaiga ua aofia i talosaga nei ua sauni.
O nisi foi o le aupalota e fai ai lava ma le molimau pepelo latou ina ia toe maua foi se isi tupe mai i sui tauva pe a mae‘a Faamasinoga o nei mataupu ma o se tulaga matautia lea e oo i ai talosaga nei e pei ona laga e le Sui Palemia ua iai le Afioga Fonotoe Pierre Meredith.
O lana lapataiga ia i latou e fuafua e fai le molimau pepelo i nei faamasinoga, o loo tele foi le avanoa e faamaonia ai a latou pepelo ma o le a faasala ai foi e le tulafono pe a maua.
