O le vaaia pea o pisinisi a tagata Saina i Samoa, na afua ai se fesili i le Taitai o le atunuu mo se faamalamalamaga.
O le faaaliga a le Afioga i le Palemia, Susuga Tuilaepa Lupesoliai Sailele Malielegaoi, o se manatu faavalevalea tele lena e faavae foi i le faatagā lē malamalama ma le faaloto leaga tagata.
Ae suamalie tele ituaiga tua‘iga ia mo le faatauvalea e vave tupu ai le fefe o tagata faavaivai. O eleele uma faaleaganuu tusa ma le 80 pasene o eleele Samoa, o loo puipui e le Faavae o le Malo Tutoatasi o Samoa. E lē mafai ona faatauina.
E mafai ona lisi e fai ai se atinae, a uma le taimi o le lisi poo le 10 tausaga, ona toe foi lava lea o le fanua i le matai e ana le fanua faatasi ai ma fale o tutū ai.
Sa faatalatalanoa foi le Tulafono o le lisi o fanua i fonotaga sa taitaia e Rev Fauolo – ina ua manino tatou tagata i lea faamoemoe lelei ona aumai lea o le latou fautuaga ua talia e tagata lautele le lisi o fanua faaleaganuu ma ua uma foi ona pasia e le Palemene le Tulafono.
O fanua faalemalo ma fanua umia saoloto ua avanoa mo ni atinae tetele e pei foi ona fai e le Yazaki tulaga na manaomia o le lisi o le fanua, e taugofie mo latou e fia amatalia o ni pisinisi, nai lo le faatau o le fanua e tele le seleni e alu ai, ae o loo pito moomia le seleni e faagaioi ai le atinae.
Na faaalia foi e le Afioga i le Palemia, le aliali pea o manatu faailogalanu, ai ana o ni papalagi Peretania poo Siamani e leai lava ni tetee faapenei.
