E lē faigofie se faamoemoe o se Ekalesia, o se aiga, o se faalapotopotoga, o se mafutaga poo se alalafaga, pe a maluelue lona faavae.
Ou te talitonu, o le mafutaga mamalu, a le Laumosooi mai Siumu, i totonu o Sini Ausetalia, ua lava tapena le faamaopoopoina o ana galuega, ina ne‘i faatagisia pe tapā foi se fesoasoani mo ni atina‘e i Samoa. O le ala lea, na faatumulia ai le nofoaga o le Community i St Clair i la latou tusigaigoa, i le Aso Toonai, aso 2 o Aperila.
Ua atoa tino o le tama, i le faamalumaluga a faafeagaiga ma o latou faletua, mai le Ekalesia Metotisi, aemaise le faatasi atu o lo latou faauluuluga, le susuga i le Sea o le Sinoti, Halefoti Seloti.
Na auasa mamao mai Samoa, le tina matua poo se tasi foi o poutu o lea itumalo, le afioga ia Atanoa Leula ma le failautusi o le matagaluega, Su’a Levasa, aua se toomaga mo le faamae‘aina o le totogiina o aitalafu ma nisi galuega a le Ekalesia Metotisi i Maninoa Siumu.
O se faamatalaga mai a se alo e faasino i lenei alalafaga, e na o le Ekalesia Metotisi le fatafaitaulaga, o lea ua manino lava le pulupululima faatasi o le itumalo, ina ia lafo lava le taulaga ma le mafaia.
Na filogia foi malo faaaloalogia poo le vasega i faafeagaiga, i le lagolagosua, a se tasi o tamalii iloga o le atunuu, e lē gata i upufai o malo, ae o itu tau a‘oa‘oga, le Afioga Leota Leuluaialii Ituau Ale.
E pei ona masani ai si o tatou atunuu, e faamuamua le Atua ma ona viiga, ua aulia ai ma manū le aso na atofaina.
Matuā onomea ma tatau le filifiliina o le afioga ia Su‘a Lavea Teofilo, o ia foi o le failautusi a le mafutaga, e avea ma fofoga o le aso. E tusa poo le ā le tātā o le fatu, ona o se matafaioi fita, lea na nafa ma ia, ae a toē ma fiafia le mamalu lasilasi, e mautinoa foi, le matuā aunoa ma se sene apa e totoe i le taga poo le ato tupe a Mama, ona o le faananau loto o ana faaupuga.
O loo taitaiina le mafutaga e le afioga i le Taitaifono o Tuuu Nonu Faatoafe, Aao tusitusi Su‘a Lavea Teofilo ma le teuoloa, Unasa Mase Unasa.
E lē taumatea foi i latou ona o le togiga matagofie na faaaogāina i lea aso, o le samasama ma le lanumeamata, e pei o le mosooi sasala lelei. E faapena foi le tele o taumafa felanulanuai, na faamalie finagalo, toe mataina le laufofoga fiafia o le tupulaga talavou, na tautuaina le mamalu eseese o lo tatou atunuu.
O siufofoga malu o le faili a le Legend, na logomalie ai le faamoemoe, ae na faaiuina i le ofoofogia o le loto o le sui o le Samoa Times, ona e ta le fā i le aoauli lava lea, ae ua tauaaoina e le mafutaga le foai alofa e $75,401.15.
Na taui le alofa i le alofa e pei foi ona toe fua atu e le Laumosooi mai Siumu, i le anoanoai o faaaloaloga faaleaganuu, na silamiō ai le auvalaaulia, a o alo i latou i tu ma aga i fanua.
Ua sili lava le manuia o le na te foai, auā e lauusiusi lona taui mai le lagi, ona o le Atua ma lana galuega.
