Na faamanatuina le 70 o le susuga ia Ps Sione Fereti Purcell mai Malaela Aleipata i le Aso Toonai na tea nei. Sa faataunuuina lea i le Tiafau Hall a le Ekalesia EFKS South West Brisbane, matagaluega Kuiniselani i Saute.
O le susuga i le faafeagaiga o loo galulue ma le faletua ia Atana‘i Viola Purcell ma le nofoaalo ia Chris faapea Jessie ma le aiga i le Ekalesia AOG Church of Samoa.
O le susuga i le faafeagaiga ia Ps Pule Lualua mai Niu Sila sa taitaia se sauniga lotu faamanuia mo le auauna a le Atua.
O se po fiafia o le faifeau ma ona tauaiga faapea uo ma ē masani mai Sini, Melepone ma Niu Sila aemaise le Ekalesia ae tainane foi le Aoga Faale Tusi Paia a le Agape Bible College Brisbane auā o ia o loo tu i matagiolo o le Peresetene o le Aoga lea o loo faauluulu i le susuga i le faafeagaiga ia Ps Peniamina Williams.
Na matuai foi le aofia ma le mama ua lomi ma vaa ua gogoto ona o le taumafataga uigaese ma le faamalie loto sa tapenaina e le Uncle Sam’s Takeaway, le tofa ia Poulava Sam ma le tausi ia Lona Matautia.
O nisi nei o auauna a le Atua na auai mai e molimauina le aso soifua o le susuga i le faafeagaiga ia Ps Sione Fereti Purcell o loo molimoli atu alofaaga ma faamanuiga i le atoaga o lou 70 tausaga. Ia saga tului pea e le Atua lou soifua auā le aiga aemaise tiute ma faiva o le galuega a le Atua.
Ps Pule & Mafutaga Lualua (taitai NZ); Ps Moapi Tuaau (NZ); Ps John & Esther Ropati (Sydney); Ps Paulo & Olita Lualua (Sydney); Ps Enoka & Loreta (Sydney); Ps Tuala & Fuarosa (Melbourne); Ps Tekele & Siatua Malaki (Brisbane); Mulaulau & faletua (Brisbane).
O alofaaga e lē mafai ona mavae mai le Aoga Faale-Tusi Paia ‘Ia Malamalama Agape Bible College Brisbane faapea le ekalesia ae faasilisili alofaaga mai le nofoaalo ia Chris, faapea lou afafine ia Jessie, toalua ma le fanau ma aiga uma, ae afe mai lau tautoga,
le faletua ia Atana‘i Viola Purcell.
