O le vaitau o le toe foi i Aoga o Fanau e lē o toe faigofie i Sini Ausetalia nei e pei ona faailoa e le toatele o tagata Samoa ma tagata lautele. O mafuaaga masani e pei o le tuanai o le Kerisimasi ma le tausaga fou ma uma atu ai ma le paketi a aiga taitasi o se tasi lea o mafuaaga masani.
E lē gata i lea o le taimi foi lenei faatoa amata galuega ae i le tolu tausaga talu ai ua vaaia le utiuti o galuega ma ua tele na faamalolo ai le toatele ma faigata ai le tausiga o aiga.
Mo nisi lava aiga Samoa, o le afea e faalavelave ma tuatuagia faafuasei e aafia tele ai le faasoa pe afai foi ua faaletonu le suafa i aitalafu ma leai se agavaa mo ni nonogatupe e faatino ai mau faalavelave faapea valaaulia i sailiga seleni eseese.
O le mafuaaga lenei ua talisapaia ai e tagata ua faalogo ma silafia le se‘i amata a le Digicel 2015 lea e silia ma le $5000 tala le aofai o tupe ma pepa faatau e maua mo meaaoga, lavalava ma togiga auā le toe taliu atu i aoga o le fanau.
Faaalia e nisi i le sui o le Leitio FM89.3 i Sini le telē o se fesoasoani pe a manumalo i lenei faapitoa mo Ianuari e pei ona faailoa mai e le alii Pule o le Digicel i Kuiniselani ia Chris Tuia.
E lē gata i lenei laveai i le masina o Ianuari ae manatua pea e le toatele le sao o lea kamupani i le lagolagoina o le tele o Nusipepa Samoa o loo faasoa mai ai tala mai si o tatou atunuu.
