Ua faamaonia nei e toetoe lava 5 miliona le vaegatupe na faatupe ai polokalame uma o le faailogaina o le Iupeli Auro poo le 50 tausaga ua aulia o le Tutoatasi.
O le vaegatupe atoa lea na faaalu mo sauniga uma ma tauvaga sa faataoto e le komiti aemaise o isi fuafuaga e pei o meaalofa mo nuu ma afioaga na lautogia mo le tapenaina o faafiafiaga i pese ma siva faapea le afioaga o Leulumoega sa feagai ma le ‘ava o le feiloaiga e faafeiloai ai malo valaaulia.
Ua faaalia ese molimau e tai 40 afe tala o le a faameaalofa i nuu ma afioaga ma itumalo ua saunia nisi o faafiafiaga ae le faitaulia ai seleni o le a faatino ai faaaloaloga faaleaganuu mo afioaga masii mai Amerika Samoa ona o le valaaulia a le Malo Samoa e auai ma faafiafia i le Tutoatasi.
E oo mai i le taimi nei e lei toe faailoaina mai e le komiti pe iai nisi kamupani ma pisinisi sa tali atu i le latou aisiga mo ni fesoasoani tupe e ese mai le foai e selau limasefulu afe a le kamupani o le Yasaki Samoa.
I se vaaiga i le tulaga o tapenaga a le atunuu ua molimauina le galulue faatasi o nuu ma afioaga i le pulega a matai e opogi le faatalauula a le komiti ma le Malo ina ia faamatagofie aai ma faoa aai mai lava i le malaevaalele i Faleolo e oo mai i le talafatai o le taulaga o Apia.
O fale sa tuai le vali ua faafou, o le vao ma le otaota ua faamamā ma tau fu‘a foi le tele o nuu ma o se vaaiga matagofie lea i le molimau a le aumalaga toatele mai le Malo o Niu Sila o loo taitaia mai e le Kovana Sili o NZ lea na toai taunuu i le afiafi o le Aso Lulu talu ai, ma toe taliu ai i Niu Sila i le taeao o le Aso Sa.
