O se taeao ua atoa i ai taeao o le atunuu, le taeao lea o le Aso Faraile na tea nei i le malae o faautugatagi a Samoa i Tiafau.
O le taeao o le alausu ma le alafai o le tagata Samoa e sii le viiga ma le faafetai i le Atua o le lagi ma le lalolagi ina ua mafai ona taitai manuia le soifua ma le ola o le tagata i lea taeao taupoina.
O le taeao o le manumalo o le atunuu i le finauina o lona saolotoga mai pulega a atunuu tetele, o le taeao o le loimata maligi ona o le agaga o le fiafia ma le lotonuu, ae tainane le lagona o le Samoa moni, e ui ina mamao le nofoaga e aumau ai ae sisi a‘e le faamalama ma vaavaai agai i lona nuu moni na fanau ai.
O le taeao o soo se Samoa i le lalolagi, ioe o le taeao o le faafetai ma le faamanu, o le viiga i le Atua e toatasi, o ia na mafai ai e Samoa ona ausia lenei 50 tausaga o avea pea ma atunuu tutoatasi pulea e ona lava tagata. O le lagona o le faagaeetia, o le lagona o le loto momomo e fefiloi ma le lototele ma le faamalosiau, o lagona ia sa taatele i Tiafau i lea aso a o sisi malie a‘e le tagavai o le saolotoga o Samoa, e le Afioga Aeau Taulupoo, o le toe ulutaia o le fono a Samoa na iai i taimi faavae o le finauina o lona saolotoga.
A o pepese leotetele le atunuu o Samoa mai lava i lē ua avea ma faaao o le atunuu le afioga Tui Atua Tupua Tamasese Efi, seia oo i se tamaititi itiiti ua ia iloa upu o le pese o le vii o Samoa, a o le taimi foi lea o loo faapapa fanafanua a leoleo e 21 e faamanatu ai lenei faamoemoe ua taunuu o le laau o le soifua.
O se aso lagi lelei, mai lava i le taeao ina ua faatoa faapotopoto savali a aoga, faalapotopotoga ma matagaluega foi na matua faatumulia ai le taulaga i Apia seia oo lava i le malae i Tiafau.
E silia ma le 150 solo o savali sa faatulagaina ma o se tausaga ese lenei i le numera o savali auā sa faanumera lelei lava e le komiti ma tuuina le numera a le faalapotopotoga poo se ekalesia ma se aoga foi e savali ai.
O le mea mautinoa o le toatele o nai tamaiti aoga na tuai ona ao a‘e le taeao o le Aso Faraile lea ae sei tui le togiga ma agai loa i Mulinuu e fai lona sao i le faamoemoe o le atunuu, tusa pe na o sina minute pe le atoa foi se afa itula e savali ai agai i luma o le malo ma le au valaaulia, ae o le manatu maualuga ina ia mafai ona togi se maa pe tuli foi sona ‘ai mo lona atunuu e ala i le auai ai i le solo o savali i lea taeao.
O le taimi na usuina ai le vii o le fu‘a o le saolotoga o Samoa na ese le faalogona i lea taimi, o le toatele sa toe tomanatu i le gaoā sa asaina mai e o tatou tuaa ua taooto mai i Ti’asa lea ua a‘e malo ai faiva o le atunuu e pei ona iai le muagagana, Ua malietoa ua malo tau.
Felanulanuai le vaaiga na iai Tiafau ma le taulaga i Apia i lea aso mai lava i nai alo ma fanau laiti mai le tai 2 tausaga le matutua, na molimauina lo latou auai ai i solo auā le faamanatuina o le 50.
O le susuga i le faafeagaiga, o le peresitene foi o le ekalesia Metotisi, susuga Tupu Folasa, sa taitaia le sauniga ma faaautu ai lana mau i le Folauga a le fanauga a Isaraelu mai Aikupito, ma faigata ma luitau sa feagai foi ma le fanauga a Isaraelu.
O le malelega a le ao mamalu o le malo Tuiatua Tupua Tamasese Efi na ia ta‘ua ai le isi auga autu o le tāua o le faamanatuina o lenei faamoemoe. Toe tepa ai foi i nisi o luitau sa feagai ai e le gata i le taimi ua sola ae o le amataga foi o le isi savaliga mo le isi 50 tausaga o le atunuu.
O le komiti o tapenaga o le Sisigafua, sa taitaifono ai le afioga i le minisita, Fiame Naomi Mataafa, ma nisi o le itupa o alii, ma o loo avea foi i latou ma minisita i le taimi nei.
Ma na maualuga le silasila a nisi o le au valaaulia i le lava tapena o le komiti i le tulaga tau le togiga ma itu uma aua le tauleleia o polokalame o le Fu‘a.
O le afio atu o le afioga i le Kovana Sili o Niu Sila, Sir Gerry Mateparae, ma lana aumalaga faatasi ai ma taitai o le tele o atumotu o le Pasefika sa tali atu ai i le valaaulia a Samoa i le faamanatuina o lona 50 tausaga.
O le asiasia o le tulai faaaloalo a malu o le malo o Samoa e pei ona masani ai e le afioga i le Ao Mamalu o le Malo sa faataunuuina ina ua toai taunuu Tui Atua i le malae i Tiafau.
O pese o le sauniga autu na fofogaina e le aufaipese a le ekalesia Metotisi mai Piula ae o le fofoga o le aso o le faauluuluga o le matagaluega a le malo Vaosaoletuifiti Epa.
O se tausaga ese lenei i le umi o le taimi na faagasolo ai savali faaaloalo ona o le toatele tele. Faaiu savali i le solo tele a le Aiga Malofie lea na matua iloga ona faateia ai le atunuu e le gata i le toatele o sui o le faalapotoptoga na auai ai ae o le mataina foi o a latou faafiafiaga sa faatino e faauma ai le solo o savali faaaloalo.
O upu o le pese na pepese ai tagata Samoa e le gata i Tiafau i lea aso ae o soo se vaega foi o le lalolagi na maua mai ai sauniga faamanatu o le 50 tausaga o Samoa i lona tutoatasi, o loo faamalosiau ai le atunuu ina ia tagai i lana tagavai ua agiagia, o le pale foi lea o le ata o le manumalo ma le manuia mai le Atua e pei ona iai le taitaiga ma le puipuiga o le atunuu i totonu o lenei 50 tausaga ua aulia manuia.
E ui e lei mae‘a nisi o polokalame faatulagaina mo le Tutoatasi i lenei tausaga ae o le agaga o le fiafia ma le faafetai i le Atua ona o lona alofa ia Samoa.
O le taimi o le tulai o le tagata Samoa ma vivii i le Atua, o le taimi o le faaagiagia o le Fu‘a o le saolotoga ma le pale e pei ona faamanuiaina ai le tagata ua manumalo.
O le luitau mo le tagata Samoa ina ia tulai ma taofi mau lona pale o le faailo lea o le Alo o le Atua na maliu mo Samoa ua mafua ai ona mafai ona tautai e Samoa lona lava sa e ui i le tele o le mau faafatiatamai o le soifuaga nei, ae o loo malutia pea le atunuu i aao agalelei o Atua. Manuia le 50 tausaga o le saolotoga o lou atunuu Samoa!
