Ua mae‘a se galuega tele na faatautaia i le motu o Manono-tai, lea ua mafai ona agai i ai fanau a le motu i ona pitonuu uma.
O Faleu i Manono lea ua faatū ai le faleaoga fogafale lua lenei ma ua aofia ai potu aoga e 8, o le potu aoga mo suesuega i computers, o le potu aoga mo le aoaoina o le musika ma le potu o faiaoga faapea ai le faletusi a le fanau.
O se fale tele lenei ua vaaia i le motu, ma o le malo o Saina lea na fausia lea faleaoga. O totonu o potu aoga uma o loo iai televise, ma o le faamatalaga a lea Malo e aogā le iai o nei televise auā le faaleleia o fesootaiga a le fanau. Ona pau lava le faafitauli o le faigata ona faasoasoa lelei le eletise. O Manono lea e ola i le malosiaga o le lā lana eletise ma e faasoasoa lelei lava le aofai o iunite e faaaogā i lea aso ma lea aso auā le mautinoa e umi le taimi, aemaise i taimi o timuga e maua ai le eletise.
O se tasi foi lea o faafitauli na feagai ma i latou na fausia lenei faleaoga, le konekarate Saina e ta‘ua o le Shanghai Construction, na o latou ta‘ua o le fai ma motusia o le eletise.
O le isi luitau tele o lenei galuega o le feaveai lea o meafale i le va o le motu o Manono ma le motu o Upolu i ‘alia ona e na o le pau lava lea o le auala o fesootaiga i le va o nei motu e lua. Sa ta‘ua ai le tele o le taimi na alu ina ia mautinoa e lava meaafale mo le fausia o le faleaoga foi a le fanau.
O le faamalosiau masani a le alii Palemia, o lea ua faaauala mai i le va galulue faatasi ai ma le malo o Saina lenei fesoasoani, ma o lea la ua mautu mea uma o le fale, ae o le ‘anofale, o le matafaioi lea a le pule aoga ma faiaoga aemaise foi i mātua. Faaalia e le alii Palemia e lē tatau ona toe faaletonu le tulaga o iai iuga o aoaoga a le fanau i lea tausaga ma lea tausaga.
O le aoga laitiiti sa iai muamua na ta‘ua e le nuu na faatama‘ia i se afi ae o lea la ua fausia lenei faleaoga ma ua tautino foi le komiti a le nuu, o le a latou vaaia ma le toto‘a lenei galuega tele ina ia umi tausaga o faaaogā e fanau a le motu.
