O le toe amatalia o aoga a le fanau mo lenei tausaga ua vaaia ai i lenei vaiaso le felanulanuai o togiga a aoga eseese ma ua tumutumu foi le taulaga i taeao ma afiafi i fanau aoga a le atunuu. Sa faia sina sailiiliga i le tulaga sa iai le taunuuga o suega a le fanau mo le ulufale atu i le Iunivesite aoao a Samoa i le Papaigalagala, ma e toatele lava ua pasi ma e mafuli lava le numera o fanau ua maua lea avanoa ia i latou sa aoaoina i le Kolisi o Samoa ma le Kolisi tutoatasi o Robert Louis Stevenson.
O se tasi o tamā e maua galuega lelei ma umia ni faailoga i se tomai faapitoa, ae ua taofia lona suafa mai le faasalalauina, sa ia faamatala lona faanoanoa ina ua maua mai togi poo maka o lona atalii e lē maua togi e ulufale ai i le vasega faavae o le iunivesite a le atunuu le University Preparatory Year (UPY).
O se kolisi a le ekalesia Katoliko sa aoaoina ai lona atalii ma taunuu ai i le Vasega 13 na sue ai le suega e ulufale ai i le Iunivesite. O le molimau a le tama, e lelei tele lona atalii i le aoga ma e lē o se tamaititi ulavale ma tafao solo ae na o le toaga lava i le aoga ma fiafia i le taaloga o le teuteu tino poo le body building.
Na malaga lona atalii ina ua uma suega ma feagai loa ma malologa umi o le faaiuga o le tausaga ae tālia le faaiuga o lana suega. “Na matuā ou faanoanoa lava ina ua maua mai le faaiuga e lē au maka o lo‘u atalii i le Iunivesite ma sa ou fesili pe aisea ae sa lelei tapenaga uma.
Na saili loa le tamā i le kolisi sa aoaoina ai lona alo ma iloa ai le faaletonu. “Na iloa ifo o ana IA’s ua transfer i le isi tamaititi na tuli ma le aoga, ona alu lea i le isi kolisi a le ekalesia lava lea”.
O le faaletonu lea na mafua ai ona lē maua ona togi o ia pepa ma faaletonu ai. Peitai na faia sailiga i le Matagaluega o Aoga a le Malo ma faamaonia ai. Na saili mai pepa ma maua ai e lelei maka poo togi ma suia ai le aofaiga o togi ma ulufale ai loa i le Iunivesite.
O le tamaititi na transfer i ai pepa a le atalii o le tamā o loo ulufale foi i le Iunivesite, ma o loo iai le masaloga o IA’s a le atalii o le tamā na faaletonu togi, lea ua selesele ai lea tamaititi ma maua ai lona avanoa e pasi ai mo le ulufale i le Papaigalagala.
Faaalia e se molimau mai le matagaluega o aoga, e faapea foi nisi o mea na tutupu i le tausaga ua mavae. Peitai o lea lava e tupu e lē o mafai ona foia. O le faamatalaga a le tamā i le tusitala, e lē manao e toe sailiili atili pe na faapefea ona tupu le faaletonu ae o le mea sili ua taliu mai le tafaoga a lona atalii mai atunuu i fafo ua manuia lana suega, ma o le a ulufale i le tausaga faavae o le Iunivesite aoao a Samoa i lenei tausaga. O le amataga o lenei vaiaso o loo faasolo ai le lesitalaina o fanau i le iunivesite, le Enrollment.
