Ua faaleo nei e alii ma faipule o le afioaga o Solosolo i se tulaga faalauaitele lo latou faanoanoa i le faatinoga o le tiute o le Komesina o le Matagaluega o Leoleo ma Falepuipui.
Ua mae‘a ona ave le tusi a le faauluuluga o le Matagaluega o Faamasinoga i le faauluuluga o le Matagaluega o Leoleo o loo fautuaina ai le faia o se suesuega ma molia le Afioga Leota Leuluaialii Ituau Ale i le lē usitaia o le faaiuga a le faamasinoga.
O loo faasino lea tulaga i le molimauina e alii ma faipule o Solosolo o loo faatino lava e lea tamalii lana faiganuu, ae semanu ua iai le faaiuga a le faamasinoga o fanua ma suafa na fofogaina ia Tesema o le tausaga ua mavae, ua poloaina ai Leota Ituau Ale e taofia loa lana faiganuu ona e tasi lava le faiganuu i Solosolo.
Faaalia e se matai o le afioaga, le Tofa Le‘au Va‘asa ua faalua ona tusi le Pule Sili o Faamasinoga i le Komesina o Leoleo ae leai lava se gaioiga o faia.
Peitai talu ai nei na faasalalau ai se taaloga Bingo e faia i le nuu o Leota Ituau Ale ma lona aiga i Solosolo, peitai na faia se faasalalauga a alii ma faipule o le afioaga ma faalauiloa ai e tasi lava le Bingo ua uma ona iai le finagalo o le nuu e faia i Solosolo.
O le fesiligia e alii ma faipule o Solosolo o le galuega a leoleo ua faaalia ai e le Komesina o le Matagaluega o Leoleo ma Falepuipui, le Afioga Lilomaiava Fou Taioalo, e lē faigofie le galuega o feagai ma le Malu o le Malo.
“E lē malamalama ma silafia e le atunuu, e lē faapea o mataupu uma e aumai e ave i le faamasinoga auā seiloga e iai ni molimau e lagolago ai”, o le finagalo lea o le Komesina. Faaalia e Lilomaiava Fou, e tele itu o loo silasila i ai le matagaluega ma leoleo o loo faia le suesuega i le mataupu.
Faaalia e Le‘au Va‘asa, ua lua tusi a le ofisa o faamasinoga i le Komesina o Leoleo, ae leai lava se tulaga o faia ai ni moliaga o Leota Leuluaialii Ituau Ale, o le mafuaaga lea o le oso o le lē fiafia o le nuu, ona o loo vaaia le agai pea o lea tamalii e faatino lana faiganuu, ma o se faailoga o lona lē faaaloalo i le faamasinoga ma lana faaiuga.
“E lē tatau i se tagata sa avea ma faipule o le fono faitulafono ona ia solia tulafono o loo faamamalu i ai tagata uma”, o le finagalo lea o se isi matai o le nuu ua musu e faailoa lona suafa.
