O le tausaga fou lea ua fuafua le Vaega o Fuainumera Faamauina a le Matagaluega o Tupe a le Malo mo le tusigaigoa tele a le atunuu. O se galuega e ta‘i fa (4) tausaga ma faatautaia ma ua vaaia le amata ona faalauiloa o nisi o taiala ma fuafuaga ina ia mautinoa e faigofie le faatinoga o lenei galuega tele.
O le vaiaso lenei a o alo atu ai le Palemene i le talanoaina o lana tala faatatau faaopoopo o le tupe, na faaavanoa ai ma le taimi e fofogaina ai fuafuaga a le Vaega o Fuainumera Faamauina mo lenei galuega. Ta‘ua e le tamaitai Ofisa Sili Lagolago a lenei ofisa, o Malaefono Tauā, e tāua tele le amata o a‘oa‘oga ma le faalauiloa ua faagasolo nei i sui o Itumalo poo sui a faipule o le Palemene.
“O i latou nei o loo feagai ma itumalo eseese ma o i latou foi nei o le a mafai ona fesootai atu ai le tāua tele o le lagolago mai o le atunuu i le tusigaigoa”, o se faamatalaga lea a le tamaitai o Malaefono Tauā.
O le faagasologa o lenei galuega e pei ona mātauina i le ta‘i fa o tausaga ia e faatautaia ai, e tele lava ina faafaigaluega a le Matagaluega o faiaoga aemaise o soo se tasi e mafai ona feoai i afioaga auā le faamauina o faamatalaga moomia mo le tusigaigoa mai i aiga taitasi.
“O se tasi o faafitauli tele o lenei galuega o le itu lea o loo iai lava masalosaloga o le atunuu poo fea tonu o le a soona ave i ai faamatalaga o loo tāpā e i latou o loo asiasi atu i aiga ae e tatau ona silafia e le atunuu atoa, e lē na o suafa ma le matutua o tagata o loo fia maua, ae o soo se faamatalaga lava e mafai ai ona faatino fuafuaga faataatitia aemaise atinae a le Malo, e mafua ai le iai o isi fesili o loo tuu atu i le mamalu o le atunuu”.
Faaalia foi e Malaefono, e tāua lava le manino o le atunuu ina ia taofia ai le tuu mai o faamaumauga e lē o moni talu ai o faamaumauga nei e fua i ai galuegafai e pei o le iloa o le tulaga o iai atinae, o iai manaoga eseese o le atunuu aemaise o nisi o tulaga e pei o le soifua maloloina o tagata Samoa, le ola a‘oa‘oina, o le mafai e faatino ai soo se atinae aemaise o le numera o tagata, fuafua i le tupe maua a lea aiga ma lea aiga.
“O nei faamaumauga uma ua mafai ai ona vaavaai i le aotelega o le soifua o tagata Samoa, ma o le mafuaaga lea e tatau ai lava ona faamanino le mafuaaga o le tusigaigoa ma lona aogā i soo se tasi”. O sui a faipule la ua amatamea i lenei taumafaiga ma le faamoemoe e oo atu i aso o le a faatautaia ai le tusigaigoa ua silafia uma e le atunuu mafuaaga e fesiligia ai i latou.
