A uma ona tatou faia o se mea ua lelei ma matagofie, ona tatou faapea ane lea, o i tatou lava o ni auauna lē aogā.
E faapea foi la tatou muagagana masani, o le faamoemoe ua tanuuu o le laau o le soifua manuia lea.
A o le pese fiafia ma le loto faafetai o le leo lea na faafofoga i ai Samoa potopoto ia i latou sa auai atu e opogi ma lagolago i le faamoemoe o le alalafaga o Fusi Safotulafai i le Aso Toonai pei ona sa tuupoina e ala i le latou tusigaigoa.
O le faamoemoe ma le auga o lenei sailiga seleni o le toe fia fausia lea o le malumalu o le Atua i totonu o le alalafaga. Ia o tulaga masani lava sa vaaia ma maitauina i aso faapenei.
O le Isaraelu e moni e alofa, na te susu‘e lava le faamalama o lona maota poo lona laoa ma tagai sa‘o atu lava i le nuu moni ma le alalafaga na soifua ane ai, ma agai atu loa e togi se maa auā se taulaga mo le faamoemoe i le malumalu paia o le Atua.
O lagona ia ma le lotonuu o le tagata faatasi ai ma le faatinoga o le alofa i tuaa ua mavae poo fanau foi i totonu o le alalafaga, na fai ma lima e ta‘ita‘ina ai alo ma tamafanau, aemaise o paolo ma gafa o uo foi ma aumea mamae ia i latou sa auai atu ma togimaa i le faamoemoe.
E leai se aiga o le nuu na nofo tamala e tusa ma le aao foai i lea aso, ma na maua ai le aotelega o le seleni e $45,000.
O le ala lea na lagona ai le leo o le viiga, o le faafetai ma le loto faagaeetia auā na saunoa sui o le alalafaga aemaise o le komiti ma le agaga faamaualalo, ona sa lei manatu o le a latou tauaaoina se seleni faapea.
Ia na faaiuina foi lea o le mafutaga i le taligasua na saunia lelei ona taape ai foi lea o le paia ma le mamalu o le atunuu ma le mama ua lomi ma le vaa ua goto e tusa ma le faaaloalo i meataumafa na tapenaina lelei e le mafutaga.
