Ua vaavaai nei le Ofisa o Vaomatua a le Matagaluega o Faatoaga ma Faigafaiva i Samoa i le faaauau lea o suesuega i laau o loo ola tauusiusi i Samoa e mafai ona maua mai ai le eletise pe a susunuina.
O lea tulaga ua faaalia e le Faauluuluga o le Vaega o Vaomatua, le afioga Anae Aukuso Levasa, ua taulai nei ia suesuega i le afioaga o Asau i Savaii ina ia faamautu ai se nofoaga mo nei sailiga.
O le laau o le tamaligi faapea le laau e pei o le fuapepe, o le pulu vao ma le pulu mamoe, o laau nei ua ta‘ua faapea, a susunu o latou fafie ua mafai ona aoina ai le malosiaga tau eletise.
O laau nei ua ta‘ua e Anae, e matuā tele lava i togavao o le atunuu ae e lē o iai se aogā i le taimi nei ona ua tele ina lē toe faaaogāina.
“O le laau foi lea o le tamaligi ua na ona tupu laulauā ae ua na o le paologia ai o laau Samoa o loo taumafai le Ofisa ina ia totō ma faaolaola.
Ona pau la lea o se isi auala ua mafai ai ona faaaogā ia laau, e ese mai i le taumafai e tapē, ae o loo maua mai ai le malosiaga faaeletise”.
“O le afioaga o Asau ma ona togavao o loo matuā tele ai lava le fuapepe ma le tamaligi ma o le mafuaaga lea o le agai o le vaai a le Ofisa i lea afioaga mo le faatuina ai o lenei atinae faapea ai suesuega faaauau”.
O le fuapepe ua taatele i Asau ona sa faaaogā e faamalumalu ai i le koko sa totōina i lea itu o Savaii, a o tulai mai Siamani i le pulega o Samoa, o lea la ua fai atu faatoaga koko ma ua lē toe moomia ai foi se numera tele o ia laau i lenei vaitau.
“O lea la ua maua le aogā tele o le tamaligi, pulu vao, pulu mamoe ma le fuapepe, auā o lea o le a faaaogā e susunu ae maua mai ai le eletise. E sili mamao atu le faaaogāina lea nai i lo le tapē”.
O le tasi lenei o taumafaiga ua sailiili i ai le Malo i le taimi nei i le taumafaiga lava ina ia maua nisi malosiaga e tuuititia ai le faatau mai i fafo o le suauu o loo faaaogāina mo le malosiaga tau eletise ona e fai o le taugata ma o loo siisii lava le tau i masina uma, ae o loo molimauina foi o le tele o suauu ua faatau mai, ua matuā fesoasoani tele i le palapala susunu ua puaina i le siosiomaga ona o le palapala.
O isi suesuega ua faatautaia i le taimi nei ua aofia ai le malosiaga ua maua mai i ave o le lā, ae lē gata i lea o le malosiaga tau eletise e maua mai i le matagi.
Ua faaaogāina le suavai i le taimi nei auā le eletise maua ma o se tasi lea o auala ua manatu le Malo, a mafai ona faaititia ai le suavai alu ona o le eletise ae maua mai i le laau susunu e pei ona galulue ai le Ofisa o Vaomatua i le taimi nei, o le a tele le faasao o le a vaaia, e lē gata i le tupe alu i le suauu ae ua faapea foi ona faaititia le suavai maua talu ai le tele o le vaega o loo faaaogāina mo le eletise i totonu o Samoa.
Ua iai foi se isi suesuega ua faaaogā ai le suauu e maua mai i le popo ina ia utu ai taavale, ma o nisi o taavale a le malosiaga tau eletise lea ua faaaogā.
O isi auala ua saili i ai le atunuu e ala i Matagaluega a le Malo, o le saili lea o nisi ituaiga oloa e gaosi mai i fua o laau a Samoa lava ia ina ia maua ai se suauu mo e mafai ona sui faatasi ma le suauu mai fafo.
O se auala e faaitiitia ai lava le suauu e faatau mai i atunuu mamao e toe moomia i le lumanai.
