E le o toe mamao ae faamamalu i Samoa se tulafono faatonutonu fou o taavale afi ua tapu ma faasa ai ni ave taavale ona toe uu le foeuli ma faaaoga le telefoni feaveai poo mobile phones.
O le tausaga na tea nei na faamamalu ai se tulafono faapea i Niu Sila ae ua molimauina le taua tele o lea tapu mo le puipuia o le saogalemu o tagata feoai i taavale e pei ona pasia e le Malo o Samoa.
Ua tuai nei ona faatino ona e lei saini le aao o le Ao o le Malo i le tulafono faatonutonu. Ua faaalia mai e le Pule Sili o le Pulega o femalagaiga i luga o le laueleele (Land Transport Authority) le afioga Leasi John Galuvao, o le a amata ona mataitu e leoleo le tulafono faatonutonu pe a amata, ae o le a iai ma ni tagata faigaluega a le latou pulega e faia foi le galuega o le molia o ave taavale e solia lea tulafono.
“O le vasega o Leoleo o le a latou amatalia le faamamaluina o le tapu o le faaaogaina o telefoni feaveai e ave taavale.
O loo faagasolo tapenaga a le Pulega o Felauaiga i le Laueleele mo le faafaigaluegaina o Authorised Traffic Officers latou te faia moliaga o ave taavale e solia nei tulafono faatasi ai ma nisi tulafono tau taavale afi” na saunoa ai Leasi John Galuvao.
O le fonotaga mulimuli a le kapeneta a o lei faia aso malolo o le faaiuga o le tausaga na tea nei 2009, na pasia ai lea tulafono faatonutonu. Faaalia e Leasi e oo atu i le $400 tala le faasalaga tupe mo le ave taavale na te solia lea tulafono fou.
O le faaiuga lea a le kapeneta na molimauina ai le ave o le faamuamua a le Malo i le faataua o le saogalemu o tagata uma i luga o alatetele.
“O le agaga faavae o lenei tulafono, ina ia puipuia atili le saogalemu o soifua o tagata ma meatotino mai i faalavelave e faaono tutupu i feoaiga i taavale i ala tetele, e ala lea i le taofia o le faaaogaina o telefoni feaveai a o aveina taavale afi,” o se vaega lea o le faaiuga. Ua taua ai foi e faapea:
“E pei ona aiaia i lenei Tulafono Faatonutonu, e lē faatagaina soo se tagata o loo ia aveina se taavale ona faaaogaina se telefoni feaveai. Ma o le faaaogaina o le telefoni feaveai e aofia ai:
a) le faalatalata o le telefoni i le taliga tusa lava pe o faalogologo i se talanoaga pe leai foi;
b) le tusitusi pe lafoina foi se fesootaiga e faaaogaina ai le telefoni;
c) gaoioiga e ki pe tape foi le telefoni;
d) soo se gaoioiga lava e aiaina ai soo se vaega o le telefoni feaveai.
Ma o le a avea o se solitulafono e faasaga i soo se tagata lona lē tausisia o aiaiga o lenei Tulafono Faatonutonu. O le a faamamaluina lenei Tulafono Faatonutonu i le tuanai ai o aso e sefulu ma le fa (14) talu ona faia e Lana Afioga Mamalu i le Ao o le Malo o Samoa.
Ua faaalia e le pule o le Pulega o femalagaiga i luga o le laueleele o le ogatotonu o le tausaga nei o le a amata faatino ai suiga fou o le molia e leoleo ma ofisa o taavale afi (authorized traffic officers) o ave taavale ma tuu i ai le faasalaga tupe ona ō lea e totogi i le ofisa o le pulega.
O se faiga o loo faatino foi i atunuu i fafo ae o se taimi muamua lea o le a faatino ai i Samoa. O le a tele ai le taimi e faasaoina o leoleo i le tau fai o moliaga ma ave i le faamasinoga e pei ona faatino lea faiga tuai i le taimi nei.
O loo faatalitali le taimi e saini aao ai le Ao o le Malo i le tulafono faatonutonu fou ona faatali lea sei maea le 14 aso ona amata faamamalu ai lea.
