Taunuu le au faafiafia Ekalesia EFKS Faatoialemanu

Sa oo lava ina laulautuu le mamalu o le atunuu, ina ua faigata ona maua se avanoa i totonu o le hall a Nafanua, ina ua lolofi atu le toatele o tagata e fia maimoa ma molimauina foi le matautia ma le logologoā o tala aave mai o le au faafiafia a le Ekalesia EFKS a Faatoialemanu, aemaise ai lava o le taimi muamua lea o le latou faafiafiaga talu ona taunuu mai i Aukilani mai Samoa.
A o lei malaga mai lea au faafiafia, ae sa maua lava i le tele o uaea mosooi, ma taua ai le matagofie tele o siva ma gaioiga faatino a lea foi autalavou.
O le po o le Aso Faraile na tea nei, na matua faamaonia ai e le tatou nusipepa ina ua faatasi atu i ai, atoa ai ma le molimau a le toatele o i latou sa auai i lea afiafi, ina ua vaai tino i ai.
A o lei amataina le polokalame i lea afiafi sa tatalaina i se sauniga lotu sa taitaia e le susuga i le faafeagaiga taulagi a le Ekalesia PIC Avondale, le susuga ia Rev Asora Amosa.
O le tatalaina o faafiafiaga sa faapea foi ona sausaunoa ai le susuga i le feagaiga, ina ua valaauina e le fofoga o le po, ma o le fofoga foi lea sa faalauiloaina faafiafiaga taitasi i lea po. O le pese ma viiviiga o le afioaga i Faatoialemanu, sa lagiina e tamaitai e toafa, sa amata ai faafiafiaga.
O siva tuufaatasi a alii ma tamaitai, faapea siva sa faatinoina na o alii ma na o tamaitai foi i nisi o taimi, sa felafolafoai lava, ma faasolo ai lava foi i nai ata malie sa fai ma vavae ai foe o le mea atoa, seia oo lava ina faaiuina.
O le faamoemoe o le malaga mai o le au faafiafia, o se sailiga seleni mo le faamaeaina o le tau o le mauga o le Atua ua tu nei i totonu o le afioaga ma le ekalesia.
O loo iai le faamoemoe, o seleni uma o le a maua i lenei malaga mai, e ala i faafiafiaga ua tapenaina e le autalavou, o le a fesoasoani tele lea mo le totogiina o nisi o vaega tupe sa faaune mai mo le galuega i le taimi sa manaomia ai, a o faagasolo le galuega i le taimi ua tuanai ai.
E toa 52 le aofai o le faigamalaga e aofia ai ma fanau e toalua o loo malaga mai ai. O le susuga lava i le feagaiga taulagi o le afioaga i Samoa, le susuga ia Paulo Koria, ma le faletua ia Mafutaga Koria o loo taitai mai i le malaga, ma o le faatonu foi lea o le autalavou.
O le susuga ia Papaliitele Penehuro Savea Malietoa o le peresitene lea, ma le tofa ia Mulitalo Sailo Tulifau o le taitai o le autalavou, ma lona sui o Sofe Salanoa. O le sui peresitene o le susuga ia Taupau Fuga Ioane Uale, ma le teutupe o le tamaitai o Faafetai Koria, a o le failautusi o le autalavou, o Melissa Wulf-Naseri.
O sui o le laulau o loo malaga faatasi uma mai ma le aumalaga, sei vagana le sui taitai ia Sofe Salanoa, e le o mafai ona malaga mai.
O le ekalesia PIC Avonadale i Aukilani o loo talimalo i le iai i Niu Sila nei o le susuga i le feagaiga ma le laulau, aemaise le mamalu o le aumalaga mai Samoa.
E tolu vaiaso ua fuafua e iai lenei aumalaga i totonu o Aukilani, ma e le o iai foi se manatu e laasia Ueligitone mo le faamoemoe.
O le feiloaiga a le Samoa Times ma le tamaitai failautusi o le autalavou, Melissa Wurf-Naseri sa ia taua ai, e iai le taimi o le a feiloai ai ma le mafutaga a tamafanau a le afioaga i Aukilani ma Ueligitone i Aukilani lava, ae le o iai se faamoemoe e malaga i Ueligitone.

Polokalame Faagasolo mo vaiaso o muamua:
Aso Lua – 12 Ianuari EFKS Hamilton
Aso Faraile – 15 Ianuari EFKS East Tamaki
Aso Toonai – 16 Ianuari EFKS Te-Atatu
Aso Lua – 19 Ianuari EFKS Weymouth
Aso Tofi – 21 Ianuari EFKS Mangere
Aso Toonai – 23 Ianuari EFKS Papakura
Aso Lulu – 27 Ianuari EFKS Grey Lynn
Aso Tofi – 28 Ianuari Faamavaega ma le
Ekalesia PIC Avondale
Aso Faraile – 30 Ianuari Faamavaega ma le mafutaga
a Faatoialemanu Aukilani &
Ueligitone