I le atoa ai o le 7 tausaga talu ona faavae ma foafoa mai le Matagaluega Ekalesia Metotisi i Browns Plains, sa solosolo lelei le galuega e ala i le Aao taitai o le Atua. Na atofaina le Aso Toonai, aso 2 o Mati 2013, e faamanatuina ai lenei aso faapitoa ma o se aso o le agaga faafetai na feiloai fiafia ai le aufaigaluega, Faasinoti, aiga, uo ma ē masani. O le susuga ia Rev Fereti Vaalepu o se lupe faalele mai (Satupaitea ma Gautavai) ma le faletua ia Muaina Vaalepu mai Faleapuna o loo tausia le ekalesia.
E 8 matafale a le aulotu ae na o latou faamaopoopoina se aofaiga e tusa ma le 22,000 ma le isi vaega o le maau ma le milomilosia, na maua ai le $34,000.00 mai le aofia sa auai atu. Na mamalu le aso auā na auai le sea o le faasinoti le susuga ia Rev Soafa Mulipola sa taitaia le sauniga faafetai, sa auai foi le Peresetene o le Auso Fealofani, le faletua ia Logotaeao Mulipola.
O nisi o vaega tāua o le faamoemoe, o le faapaiaina o le keke sa feagai ma le tausimatagaluega ia Rev Fereti Vaalepu ae feula moli e le peretesetene o le auso le faletua ia Logotaeao Mulipola.
Na faaalia le valevale alofa e ala i faaaloaloga e tali ai foi le faatalauula mai ale faafeagaiga ma le faletua ma le ekalesia. O le fofoga o le aso o le afioga ia Faumuina Laumatia Sione (Fausaga).
O le fetalaiga ia Faatoatoa Poamo Lauti (Satupaitea) sa tu tootoo i le aso auā se matū palapala ole auvalaaulia. Sa fai ma sui o Tumua ma Pule e faafetaia le ekalesia le fetalaiga ia Pasēsē Kirimasi Tiata.
O le tofa ia Vaaaoao Taape (Saleaula) o le failautusi o le Matagaluega Browns Plains; o le Sui Failautusi-Apulu Lolenese Matoka (Salailua) Teutupe -Lomialagi Vallee.
Avea le nusipepa a le Samoatimes e molimoli atu ai le faafetai ma le faamalo mai le ta‘ele o fatu ma agaga o le susuga ia Rev Fereti & Muaina Vaalepu ma le Matagaluega Metotisi a Browns Plains i lo outou teu faatupu Samoa na potopoto.
Ia agalelei le Atua ma sautualasi manuia i outou aiga ma ia faatutumu mea ua faagaogaoina ona o le alofa foai i le Atua ma Lona finagalo.
Faafetai! Faafetai! Faafetai lava!
Na ta‘ape le filialii ma le vaa ua goto ma le mama ua lomi i le faatasi mai o le Atua aemaise le tele o taumafa na fau ma soloi.
