“O le mafuaaga lena o a‘u tuua‘iga i le lē faamaoni o le aufaigaluega”…Levaopolo Talatonu
O le matafaioi a le Fofoga Fetalai o le puipuia o aiā tatau o tagata e tuua‘ia i totonu o le Palemene i saunoaga ma felafolafoaiga a sui faipule, ae leai so latou leo e tali atu ai.
O le saunoaga lea a le Fofoga Fetalai le susuga Laauli Leuatea Polataivao, e faamalamalama ai lona talia o le lafo na faatū e le sui taitai o le Itu Agai e avanoa ai ona tuuina atu e le tasi o faipule o le Itu Agai, o Levaopolo Talatonu, faamaumauga e faamaonia ai ana lafoga e faapea o le lē faamaoni o le aufaigaluega a le Matagaluega o Tupe Maua, ua lē mafai ai ona aoina uma seleni mai lafoga ma tiute o oloa auina mai fafo.
O tuua‘iga a Levaopolo na mafua i le saunoaga faalauaitele a le taitai o le Itu Agai le afioga Palusalue Faapo II, lea na taualuga i ai saunoaga faalauaitele i le tala autū o le tupe ua pasia. Saunoa Palusalue o tupe ua faaalia e 450 miliona na aoina e le Matagaluega o Tupe Maua e lē o seleni ia sa tatau ona maua.
O le vaega tonu lea na tulai ai le minisita o lea matagaluega le tofa Tuiloma Lameko ma ia faaalia o se aofaiga tele seleni sa aoina. Ae o le avanoa lea na faalava ai ma le faauilavea a Levaopolo ma ia faaalia o le lē faamaoni o le aufaigaluega le mafuaaga.
O le lafo na faatū e le sui taitai o le Itu Agai e tuuina atu ai ni faamaoniga o tuua‘iga a Levaopolo na lagolagoina e le itu a le Malo ma faia ai loa le faai‘uga e 24 itula e tuuina atu ai faamaoniga o tuua‘iga. O le Aso Faraile ina ua toe tauaofia le fono usu a Samoa na tapa ai le faipule o Gagaemauga Numera 2 ma ia tuuina atu ai i le Fofoga Fetalai faamaumauga e silia i le 200 ni itulau o loo iai faamaumauga o kamupani ma pisinisi o loo nofo aitalafu i le lē totogia o lafoga ma tiute o oloa faaulufale i le atunuu.
O le Fofoga Fetalai na ia tauaaoina ia pepa ma ia faaalia e fai si mafiafia, ma e mafiafia atu nai lo le tala o le tupe ma e tatau ona matuā suesue ma sailiili lelei. Ua tofia ai e le Fofoga Fetalai ni faipule o le Palemene, e toatolu mai le Itu Agai ae toatolu foi le itu a le Malo ma le Failautusi o le Fono aoao o le latou galuega o le suesueina o faamaumauga ua tuuina atu pe faamaonia pe leai. O le aso 6 o Aukuso 2013 e tatau ona tuuina atu ai i le Palemene se lipoti a lea komiti faapitoa a le Palemene e tusa ai o le mataupu i tuua‘iga o le lē faamaoni faasaga i le aufaigaluega a le Matagaluega o Tupe Maua.
