O le lona 20 ai lea o taaloga tuufaatasi o Malo o le Taupulega, ma e lē fou le auai o Samoa i taaloga tetele faapenei faavaomalo. E lē fou foi le faamanuiaina o se tama ma se teine taalo e masii mo soo se faagatama e tauavea le igoa o Samoa, ae maualuga le agaga faafetai i le Atua ina ua maea taumafaiga e leai se tasi o faamanu‘alia i taaloga.
Ua agai i le si‘ui o taaloga tuufaatasi o Malo o le Taupulega lea na auai ai nisi o alo ma tamafanau Samoa i Sikotilani Glasgow, fitu sefulutasi malo eseesse na auai ‘ae ua faamalo le taalo tausaafia, ua malie mata e vaai, faafetai lo outou faaea atunuu’.
Na faamanuiaina Samoa i pine e tolu na maua i nei taaloga, ma e lē taumate o se tauvaga sili ona faigata, auā e tulua le maua o le pine pe leai foi, ona e malolosi foi tagata taaalo mai isi atunuu tetele o le lalolagi.
O le siisii uamea mamafa o se tasi nei o taaloga ua mautinoa le malolosi ai o tamaiti Samoa, ma ua lē ‘asa se ‘au masii a le atunuu ma se pine e maua, aemaise o se faaiuga faafiafia loto.
Pei ona silafia o le mausa lea a le ‘auaiga Opeloge i faagatama tetele faapenei e masani ai. Lea foi ua foi mai le auso tamaitai o Ele ma Mary Opeloge ma pine siliva, e lua i ai pine mo Samoa.
A o le alii o Vaipava Nevo Ioane na maua ai le pine apamemea i le sii o le vaega 62kg ma togi tuufaatasi e 271kg tulaga tolu i le Commonwealth, ma o le pine muamua foi lea mo Samoa i taaloga o le Taupulega i lenei tausaga.
O le tamaitai o Ele Opeloge, o le tatou avefu‘a lea i Glasgow, na tausinio i le vaega +75kg ma le faamoemoe mo se tatou pine auro, pei ona iai lana sii i le Commonwealth i New Delhi i Initia i le 2010 sa pine auro ai ma tata‘e le record i togi tuufaatasi e 285kg, ma o le pine auro lona lua foi lea mo Samoa talu ona auai i taaloga o le Taupulega.
Ae ui i lea ua lē ogatasi le futia ma le umele, tulaga lua i le tausinioga na se‘i mavae, faamanuiaina i le pine siliva mo Samoa. O lona uso laititi le tamaitai o Mary Opeloge, o le vaega laiti sa tauva ai, lea ua foi mai ma le faaoso lelei, o le pine siliva foi mo Samoa.
Toeitiiti lava a manuia le taumafai a Tovia Opeloge le tuagane o Ele ma Mary, i le pine apamemea i le Commonwealth i lenei tausaga, i le sii uamea mamafa foi, i le vaega o alii 105kg peitai ua lē manuia lona tausinio mo se pine ma tulaga fā ai i le faatulagaga.
Tulaga ese le tulai mai a le ‘au siisii a Samoa, pe a faatusa atu i nisi o tulaga o loo mau togi ai nisi o le ‘au e ui e lē o faamanuiaina i se pine, e pei o le tamaitai o Iuniarra Sipaia, tulaga lima i lana foi aupaga, o Faavae Faauliuli na tauva i le vaega o alii 105kg, tulaga valu i le faatulagaga.
Vanissa Lui tulaga iva i le itupa o tamaitai i le sii 69kg, Siaosi Leuo tulaga fitu i le sii 85kg le mamafa ma Petunu Opeloge o le tasi o le fanau Opeloge e toalima, tulaga ono i le vaega o alii i le sii e 85kg le mamafa.
Matagofie taumafaiga a tatou autaalo mo le Commonwealth i lenei tausaga. Semanū atonu ana manuia le taumfaiga a le tatou aulakapi taitoafitu i le sailiga o le pine apamemea ma le ‘au a Ausetalia i le vaiaso na tuanai, semanū ua faaopoopo pine mo Samoa i lenei Commonwealth. Ae ui i lea e toe oso foi le la, e toe finau foi i le isi Commonwealth.
O le Aso Sa na tapunia aloaia ai taaloga o Malo o le Taupulega, ma manino mai ai se taimi e toe taliu ai le tatou autaalo i le faamuli mai o si o tatou atunuu i Samoa.
