O le polokalame a le Atinae o Pisinisi Laiti o le Pasefika (SPBD) o se tasi lea o polokalame ua maua ai e tina o Samoa ni nonogatupe aua le faatautaia ai o ni pisinisi laiti e mafai ona faia i aiga ma nuu. O se tasi o faaputugatupe e lua e taua o faaputugatupe mo pisinisi laiti.
(Micro-Finance Projects) O le isi o loo faatautaia e le Ofisa o Tupe a Samoa ae o le isi lenei e faatautaia e se alii mai Amerika na malaga mai i Samoa ma faatuina i le tausaga e 2000 ma le taulai e aveese le ola mativa ae faaaupega tina ia e le o faigaluega ina ia saili auala e maua ai lava lana tupe maua ma fesoasoani ai i atinae o aiga. Talu ona faatuina ua tusa ma le toa 44,500 le aofai o tina ua i totonu o le faaunegatupe lenei ma o loo faaopoopo i masina uma.
O le lipoti lata mai e pei ona taua e le tamaitai o Isobel Tuatagaloa o le SPBD, e maea Iuni ua oo atu i le 25 miliona tala ua mafai ona nono atu i tina nei o le atunuu. O le tupe lea ua tuufaatasia talu mai le amataga o lenei polokalame fesoasoani.
Faatinoga o nonogatupe…
O le faatautaiga o le polokalame lenei ua tuufaatasia ai tina i mafutaga laiti i totonu o afioaga. O le tele lava o nuu e mafai ona tuufaatasia ni tina e sili atu i le toa 10 ona faaofi lea i totonu o le SPBD. O nisi afioaga e tasi lava le mafutaga tele e faaofi i le polokalame lenei ae o isi afioaga e oo atu i le tai tolu pe tai fa foi potopotoga o tina ua ofi atu i lenei polokalame.
Faaalia e le tamaitai o Luapene …. o loo taitaia le faagaioiga o le polokalame lenei i totonu o Samoa, o le tuufaatasia o tina nei e mafai ai ona faaofi faatasi mai a latou talosaga mo nonogatupe. O le eseesega tele lenei ma faletupe tetele o fefaatauaiga aua e tele lava ina fai taitoatasi nonogatupe. “Ae o le faiga lenei, e fai o le faafaigofie ai ona agai mai tina e le masani ona loan ma fai faatasi a latou nonogatupe ae o le tulaga lelei lava o le totogiga o tupe nei, e totogi faatasi lava i masina taitasi ma e fesoasoani lava le isi tina i le isi ina ia mautinoa le faaauau o lenei polokalame”.
Faaalia foi e Luapene o le isi lava eseesega tele ona e malaga i nuu taitasi sui o le SPBD i vaiaso uma aua le aoina o totogi o nonogatupe. E faato’a toe mafai lava se isi faaunegatupe pe a mae’a ona totogi aitalafu muamua ma o isi tina ua oo lava i le $5000 (lima afe) tala le tupe ua mafai ona o latou nono.
“A fuafua i isi faletupe o le SPBD lava e aupito lelei le tali mai a ona sui i le toe totogiga o a latou loans. O le taimi lenei o le 98% o ana aitalafu o loo toe totogi mai e tina”, o se faaaliga lea a Luapene.
O a atinae ua faatino…
O le tele o atinae ua faatautaia e tina e aofia ai faleaiga e gaosi ai kekepuaa, o chips e gaosi i le fa’i ma le talo palagi, o lafu puaa ma lafu povi, o faleoloa ma siapo.“O le toatele lava o tina e faaaoga a latou faatoaga i aiga e faatino ai a latou atinae, o isi tina o maumaga e atinae ae o isi o togalaau fai sua ma togalaau aina ia e tele ina e vaai ai i maketi ua faatutu i luma lava o o latou fale,” faaalia e Luapene.
Taua e lenei tamaitai talu lava ona amata mai lenei polokalame ua oo i le faatolu faafa nonogatupe a isi tina ma o le tulaga taua lava ina ia mafai ona toe togitogi mai le seleni ma ia vaaia i asiasiga a le faalapotopotoga o loo faatautaia atinae na amata ai a latou talosaga.
O se fonotaga a faalapotopotoga faapenei i le Pasefika ua maua ai ua toatele atu tagata ua agai i faalapotopotoga faapenei ona e laititi atu le pasene e totogi i aitalafu ma e foliga mai ua na o le pau lenei o se faamama avega mo i latou e moomia fesoasoani i le amata ai o a latou atinae laiti. Ua faigata tapulaa a faletupe mo atinae laiti ma ua tele ina le mafai ai ona faatino atinae a tagata o le Pasefika.
