Mai i le tausaga e 2003 seia oo mai i le tausaga e 2008, e toa 10 tina na maliliu ina ua tuu eseeseina ma pepe fou. O le aofai o tamaitai na maua i le maitaga ma fananau i falemai i Samoa, e toa 24,500. A fua i lea numera e mautinoa ua laititi le numera o tina ua aafia o latou soifua mai i le taimi e maua ai i le maitaga ma le taimi e failele ai.
Peitai e pei ona taua e Toleafoa Dr Semo Koro, o se fomai ua litaea nei ma ua silia i le 40 tausaga o galue i le fale failele, o loo toatele lava. “E le tatau ona iai se isi e toe maliu mai i le tuu eseeseina ma sana pepe peitai o loo tupu pea ma ona pau le tulaga lelei, o le itu lea ua faaitiitia lea numera,” o se faamatalaga lea a lenei tama. Peitai e pei ona taua e le alii fomai i le faamanatu ai o le Aso mo le Faitau Aofai o atunuu taitasi, o loo toatele lava pepe fou o loo maliliu.
O le va lava lea o tausaga e lima na faamauina ai e tusa ma le toa 340 pepe na fananau mai ua maliliu (stillborn) ae toa 274 na maliliu a o lei atoa le tai tasi tausaga le matutua.
E tatau ona laititi le fuainumera
O lea numera na taua e fomai i Samoa e tatau ona faaitiitia. Faaalia e le tamaitai Minisita o le Soifua Maloloina, Gatoloaifaana Amataga Alesana Gidlow, o le faamuamua o le aso mo le faitau aofai o tagata o le lalolagi ua ave ai le faamuamua i le soifua manuia o tina poo tamaitai.
Faaalia e le tamaitai minisita, o le puipuiga o tina o se faamuamua tatau ona o tina le faamoemoega o soo se aiga, ma a manuia le tina ua manuia le aiga atoa. O le tulaga faaletonu o le tamaoaiga ua iai nei ua faatuputupulaia ai foi ma le numera o tamaitai ua faatuatuanai i lo latou soifua manuia ona o le le tagolima e saili fofo i gasegase e maua ai. O se saunoaga lea a le tamaitai minisita ma na ia faaalia o le unai a le matagaluega ina ia unai le soifua manuia o tina ma tamaitai aemaise i le itu lea o le soifua fanau ma ia mafai ona faalautele atili polokalame faaleaoaoga mo tamaitai ina ia mafai ai ona malamalama i lo latou tausiga i taimi e maua ai i le maitaga seia oo lava ina tuu eseeseina o ia ma lana tama.
O le taumafaiga foi lea ua aiaia i lalo o Taiala o le Meleniuma ua sainilima uma ai taitai o Malo Aufaatasi e aofia ai ma Samoa ina ia oo atu i le tausaga e 2015 ua mafai ona faapea mai ua itiiti ifo o le numera 10 le aofai o pepe ua maliliu poo tina ua maliliu talu ai faigata o maitaga.
O le lalolagi atoa o loo oo atu lava i le afa miliona le aofai o tina o loo maliliu i tausaga taitasi ona o maitaga faigata ua le maua ai ni togafitiga.
Ua tele polokalame faalauiloa aemaise o aoaoga o loo faagasolo i afioaga eseese o le atunuu ona o le manaoga lava ina ia aoao tamaitai i le taua o lo latou puipuiga i taimi e tauave ai le tagata fou.
Ua uunaia ai foi ma tama ina ia fesoasoani i le tina o le aiga i lea taimi faigata ma ia aua nei galo le siaki e tatau ona tulimataia pea i se fomai poo se falemai foi o latalata ane.
O le matafaioi a le tina lona soifua manuia…
O le mau ua maea ona laugaina e ala i faasalalauga faalauaitele a le Matagaluega o le Soifua Maloloina, e amata mai i le taimi e afuafua ai le pepe fou o se taimi taua tele lea. O le a lava le tulaga o iai le siosiomaga o le maitaga lenei e tauave, o le a iloa lava foi i le soifua o le pepe o le a fanau mai. O le unai la i polokalame faalauiloa i tina, ina ia mafai ona puipui ma vaavaai faalelei lo latou soifua maloloina i le taimi o maitaga ina ia malosi ma ia lava malologa. Ua iai foi fautuaga ina ia amata vaai lava le fomai mai i le taimi e afuafua ai le maitaga.
“O le toatele o tina e faatoa omai lava i le falemai ua toeititi oo i le taimi e fanau ai ma e oo atu i lea taimi ua faigata ona toe foia nisi faafitauli e ono tulai mai i le ola o le pepe poo le soifua foi o le tina,” o se faamatalaga lea a se tamaitai fomai sa vaaia le fale failele i le amataga o le tausaga ina ua laga foi lenei taumafaiga o ia lea o Dr Monalisa Punivalu. Faaalia e lenei tamaitai o le mafuaaga lava lea o le tele o faafitauli i pepe fou aemaise soifua o tina ona o le tuai ona oo mai le tina e siaki i le taimi o tauave ai le maitaga. “O isi tina e faatoa omai lava e fananau ae e leai ma ni faamaumauga poo maua i nisi gasegase poo a foi faafitauli o ono aafia ai le tagata o loo tauave”.
O le fautuaga faaauau lava lea o loo fai nei e le Matagaluega e pei foi ona vaaia i le faamanatuina o le faitau aofai o tagata o le lalolagi, ina ia faamuamua e tina o latou soifua fanau ae le o le faatalitali seia tulai mai faafitauli. Ona pau foi lea o le auala na taua e fomai faapitoa o tamaitai e faaitiitia ai le numera o pepe e fananau mai ua maliliu (stillborn).
