O le valoaga a le Faletupe o atina‘e o Asia lea e aofia ai le Pasefika, e lē o iai se tulaga ogaoga e ono tulai mai i tamaoaiga o le Pasefika e aofia ai Samoa, ae a lē mataitu lelei le faasoaina o tupe maua, e ono tulai mai atumotu o le itulagi i se tulaga faaletonu.
O le tausaga fou lenei ua faamautu ai e le Malo o Samoa le taumafai ina ia faaauau galuega e lei mae‘a ona faatautaia ma saga unai atina‘e o loo maua mai ai le tupe maua a le atunuu.
Ua valoia le agai i lalo o le tamaoaiga o le Lalolagi ma e lē taumateina lea tulaga auā ua amata lava i le itu o Europa lea vaaiga i le taimi lenei. Le faaletonu o le tamaoaiga o Eleni faaopoopo ai ma le lē mautonu o isi atunuu o Europa e pei o Italia. E lē o mautu lava le tulaga o iai Europa.
Ua mae‘a faalauiloa le popolega o malo tetele o le lalolagi i le faigata ua iai le tamaoaiga lautele o lea vaega o le lalolagi ma o le valoaga e ono aafia uma ai lava ma tamaoaiga e oo lava i le Pasefika.
O le saunoaga o le Tausaga fou a le Alii Palemia, Susuga Tuilaepa Lupesoliai Sailele Malielegaoi, na ia ta‘ua ai le tele o le galuega ua faauau mai i lenei tausaga aemaise lava i le itu tau i atina‘e o tagata tafafao maimoa mai i fafo faapea ai le itu tau i fefaatauaiga.
Faaalia e le Alii Palemia, o nisi lava ia o mafuaaga na vaavaai ai le Malo i le taumafaiga e suia le aso lea ua aso tutusa ai Samoa nei ma isi tuaoi e pei o Niu Sila ma Ausetalia, se‘i vaganā ai Amerika Samoa ma Amerika.
O le mafuaaga o le agai pea i luma o atina‘e, ma “…faataga ai aso faigaluega e lima ae lē o aso faigaluega e fa e pei ona sa sau ai i aso o le vaiaso”.
Faaalia foi e le Alii Palemia, o le tele o taimi o loo fia faatautaia galuega i le Aso Sa, le aso tapuai o sauniga lotu a Samoa, e tapunia ai fesootaiga, ae o le taimi lea ua amata galuega i atunuu nei e pei o Niu Sila ma Ausetalia. O lea la faato‘ā mafai ona tutusa fesootaiga i le suiga o le aso ua iai nei.
O loo tele galuega o loo faaauau mai i le tausaga na tea nei, e pei ona iai le galuega tele o le Iunivesite o Aoaoga faafomai lea e faagasolo i Motootua lona fale tele fou, lea e fausia e le Malo o Saina. O loo faagasolo foi galuega o le faamanatuina o le tutoatasi o Samoa.
E lē gata i lea o le galuega tele a le Malosiaga tau Eletise o loo faatautaia nei i Fiaga i Aleisa auā le faamautu uma ai o le galuega o le faasoa mai ai o le eletise i le tele o itu o Samoa.
E lē gata i lea ae o loo tofu lava le Matagaluega ma le Faalapotopotoga a le Malo ma a latou foi atina‘e o loo unaia mai i le tausaga na tea nei. O le itu tau i faatoaga lea foi e ave lava i ai le faamalosi ina ia mautinoa e lava taumafa e pei ona iai aiaiga o le agai i luma a atunuu uma o Malo Aufaatasi.
I Samoa ua malosi atina‘e o lafumanu aemaise o faaaliga mo itumalo uma i fua o faaeleeleaga lea e ta‘ua o Talomua ina ia saga faaleleia ai faatoaga mo tausiga o aiga aemaise ai oloa e mafai ona faatau atu i fafo, o lea ua sao Samoa i totonu o fefaatauaiga saoloto.
O le faigata o le tamaoaiga o le Lalolagi lea foi e taumafai atumotu laiti e taofi ni aafiaga ogaoga e ono aofia ai, ona o lea ua aumai e le Faletupe o Atina‘e a Asia le fautuaga o atunuu e pei o Fiti, Samoa ma Toga o le faamalosia o le tulaga tau i lafoga e ao mai i totonu lava o atumotu nei.
